Diaspor

Ana səhifə

Diaspor

Azərbaycanın Rus İcmasının 3-cü qurultayı keçirilir

06 noyabr 2009 10:00 (UTC +04:00)

Bakı. Laçın Sultanova-APA. Bu gün Bakıda Azərbaycanın Rus İcmasının üçüncü qurultayı keçirilir. APA-nın məlumatına görə, icma rəhbəri, millət vəkili Mixail Zabelin bildirib ki, qurultaya seçilmiş 320 nümayəndədən 300 qurultaya qatılıb. Fəxri qonaqlar sırasında Prezident Aparatı ictimai-siyasi şöbənin müdiri Əli Həsənov, Milli Məclisin sədr müavini Valeh Ələsgərov, parlament üzvləri, Rusiya Dövlət Dumasının, Moskva hökumətinin nümayəndələri, Rusiyanın Azərbaycandakı səfiri Vladimir Doroxin, keçmiş səfiri Vasili İstratov, Rusiya Soydaşları Beynəlxalq Şurasının İdarə Heyətinin sədri qraf Pyotr Şeremetyev, Knyaz Dmitri Romanov Xeyriyyə Fondunun prezidenti Dmitri Romanov və digərləri iştirak edirlər.
Açılış mərasimində Əli Həsənov prezident İlham Əliyevin qurultay iştirakçılarına məktubunu səsləndirib. Məktubda deyilir ki, Cənubi Qafqazda ən böyük rus icmasının Azərbaycanda olması yüzilliklərlə Azərbaycanda mövcud olan tolerantlığın bariz nümunəsidir. Ölkədə bütün milli azlıqların hüquq və azadlıqlarının təmin olunduğunu, öz milli-mədəni dəyərlərini qorumağa imkan yaradıldığını bildirən prezident, rus icmasının Azərbaycanda quruculuq işlərində yaxından iştirak etdiyini, Azərbaycanın suverenliyi və ərazi bütövlüyü uğrunda şəhidlər verdiyini xatırladıb.
Qurultayda çıxış edən Rusiyanın Azərbaycandakı səfiri Vladimir Doroxin Azərbaycanda tolerantlığın son dərəcə yüksək olduğunu bildirib: “Azərbaycan elə bir ölkədir ki, burada sosial tolerantlıq yüksək səviyyədə mövcuddur. Ölkədə milli azlıqların öz milli-mədəni dəyərlərini qorumaq üçün bütün şərait yaradılıb, bu şəraitdən düzgün istifadə etmək vacibdir. Azərbaycanda rus icması kağız üzərində deyil, reallıqda fəaliyyət göstərir, Rusiya hökuməti rus icmasına hər zaman yardım edib və edəcək”.
Bakı və Xəzəryanı Yeparxiyanın yepiskopu Aleksandr Ata deyib ki, ruslar Azərbaycanın tam hüquqlu vətəndaşlarıdırlar: “Çoxmillətlilik Azərbaycanın sərvətidir, rus icması bu varlığın bir hissəsidir”.
Millət vəkili Mixail Zabelin icmanın 5 il ərzində gördüyü işlərdən danışıb: “Bu müddət ərzində Azərbaycan məktəblərində rus dilinin tədrisi genişləndirilib, 50 məktəbdə rus dilinin dərindən öyrənilməsi layihəsinə başlanılır. İcmanın təşəbbüsü ilə Rusiyanın Azərbaycandakı səfirliyi 120 təqaüdçünün evində peyk antenaları quraşdırılmasına yardım edib, ildə 35 nəfər müalicə olunmaq üçün Moskvaya göndərilir, 180 veteran və tənha qoca maddi yardım alır, məktəblərə rus dilində bədii ədəbiyyat və dərs vəsaiti paylanılır. Azərbaycan xalqı hər zaman tolerant olub, bizim isə ən böyük səhvimiz ondadır ki, dövlət dili olan Azərbaycan dilini pis öyrənirik. Buna diqqəti artırmalıyıq. Azərbaycan dilini bilmədən cəmiyyətə dərindən inteqrasiya etmək mümkün olmayacaq”. İcma rəhbəri Azərbaycanda hansısa bir millətin hüquqlarını pozan heç bir qanunun mövcud olmadığını deyib.
Daha sonra qurultayda Moskva hökumətinin təmsilçisi Aleksey Yesipenko Moskva meri Yuri Lujkovun sərəncamı ilə Mixail Zabelinə beynəlxalq əlaqələrin inkişafına görə “Moskva hökumətinin xatirə nişanı”nı təqdim edib.
Tədbirdə təftiş komissiyası, mandat komissiyası öz hesabatlarını təqdim ediblər, müxtəlif komissiya və icmanın rayon bölmələrinin rəhbərləri çıxış ediblər. Qurultayda icma sədrini və Respublika Şurasının yeni tərkibini müəyyənləşdirmək üçün seçkilər keçiriləcək.