Diaspor

Ana səhifə

Diaspor

Gürcüstanda azərbaycanlı bağça müdiri təzyiqlərə məruz qalır

06 noyabr 2009 23:56 (UTC +04:00)

Bakı. Elnur Məmmədli – APA. Gürcüstanın Qardabani şəhərinin 1 saylı bağçasının müdiri Gülsənəm İsmayılova təzyiqlərə məruz qalması ilə bağlı APA-ya müraciət ünvanlayıb.

G.İsmayılova müraciətində bildirib ki, iyirmi il tam təmir olunan bağçada son 8 ildə ciddi problemlər yaranıb. Onun sözlərinə görə, hazırda bağçanın dam örtüyü bərbad vəziyyətdədir, su, elektrik və qaz problemləri var. Məsələ ilə bağlı Gürcüstanın yuxarı instansiyalara müraciət etdiyini bildirən G.İsmayılova yalnız bəzi imkanlı azərbaycanlıların hesabına müəyyən təmir işləri aparmağın mümkün olduğunu deyib: “Mən dəfələrlə mövcud problemlərin həlli üçün müraciət edirdim, hər dəfə mənə işdən çıxmağımı tələb edirdilər. Məni prokurorluq ilə qorxudurdular. Artıq yardım istəmədiyim yer, idarə qalmayıb. Amma heç bir nəticə yoxdur. Bu tədris ili başlananda mənə qəti şəkildə bildirdilər ki, işdən çıxmağımla bağlı ərizə yazım. Məni işdən ona görə uzaqlaşdırmaq istəyirlər ki, bağça bağlansın. Buna görə də hədə-qorxu gəlir, eyni zamanda tərbiyəçi işini təklif edirlər”.

G.İsmayılova bildirib ki, bağçanın binasını almaq niyyətində olan qruplar mövcuddur. Onun sözlərinə görə, bağçanın bağlanmasında başqa bir maraq burada azərbaycanlı uşaqların tərbiyə olunması və azərbaycanlı müəllimələrin işləməsidir. G.İsmayılova təzyiqlərə baxmayaraq, bağçada şəraitin yaxşılaşdırılması və onun bağlanmaması üçün rayon sakinləri, valideynlərlə birgə tədbirlər görəcəyini bildirib.