Diaspor

Ana səhifə

Diaspor

Budapeştdə “Azərbaycan-Macarıstan: mədəniyyətlərin dialoqu” silsiləsindən IV Beynəlxalq Elmi Konfransın növbəti bölməsi keçirilir

17 noyabr 2009 15:11 (UTC +04:00)

Bakı-APA. Budapeştdə “Azərbaycan-Macarıstan: mədəniyyətlərin dialoqu” silsiləsindən IV Beynəlxalq Elmi Konfransın növbəti bölməsi keçirilir. Bu barədə APA-ya Diasporla İş üzrə Dövlət Komitəsinin mətbuat xidmətindən bildirilib. Konfransı açan Azərbaycanın Macarıstandakı səfiri Həsən Həsənov iki ölkə arasında əlaqələrin möhkəmləndirilməsi və inkişaf etdirilməsindəki xidmətlərinə görə Macarıstan Linqvistika İnstitutunun professoru, Macarıstan Elmlər Akademiyasının üzvü Giorgi Hazai və ELTE Şərqşünaslıq İnstitutunun direktoru, professor Istvan Vasaryyə Səfirliyin fəxri mükafatlarını təqdim edib. Sonra Macarıstan Xarici İşlər nazirinin konfrans iştirakçılarına ünvanladığı məktub oxunub. Tədbirin birinci günü ədəbiyyat və linqivistika mövzusuna həsr olunub. İclasa professor Vasary İstvan, Azərbaycan Milli Elmlər Akademiyasının vitse– prezidenti, akademik Nailə Vəlixanlı sədrlik ediblər.

Noyabrın 18-də isə beynəlxalq konfransın “TARIX, ARXEOLOGIYA VƏ ETNOLOGIYA” adlı ikinci hissəsi keçiriləcək. Bu iclasa isə Avropa Folklor İnstitutunun direktoru Dr. Hoppal Mihaly, akademik Nailə Vəlixanlı edəcəklər. Tədbirin ikinci günü “XXI əsrin əvvəllərində Azərbaycanda arxeologiya və etnoqrafiya elmlərinin inkişafına dair”, “Qafqaz və Karpat hövzəsinin tarixi əlaqələri”, “Skiflər və türk xalqlarında eyni olan ənənə və ayinlər”, “Mərkəzi Avropa və Şərqi Transqafqaz: Son tunc və İlkin dəmir dövründə işarələrin əlaqələri və trayektoriyası”, “Azərbaycanlıların etnogenezinə dair” və s. mövzular ətrafında çıxışlar nəzərdə tutulub.
Tədbirdə Polşa, Türkiyə, Çexiya, Rumıniya, Rusiya, Ukrayna, Avstriya, Azərbaycan, Macarıstan, Qazaxıstan alimləri iştirak edir. Qeyd edək ki, tədbir Azərbaycanın Macarıstandakı səfirliyinin təşəbbüsü, Diasporla İş üzrə Dövlət Komitəsinin təşkilati dəstəyi, AMEA İqtisadiyyat İnstitutunun və Macarıstan Elmlər Akademiyasının Dünya İqtisadiyyatı İnstitutunun, eləcə də Azərbaycan Parlamentindəki Macarıstan-Azərbaycan Dostluq Qrupunun iştirakı ilə keçirilir. Konfrans noyabrın 19-da yekunlaşacaq.