Diaspor

Ana səhifə

Diaspor

Kölndə Azərbaycan qadınları ilə bağlı tədbir keçiriləcək

18 noyabr 2009 23:51 (UTC +04:00)

Bakı – APA. Noyabrın 20-də Almaniyanın Köln şəhərində “Ənənə və emansipasiya arasında - Şərqi Avropanın qadınları Azərbaycan qadını nümunəsində” adlı müsahibə, musiqi və poeziya axşamı keçiriləcək.

Diaspora ilə İş üzrə Dövlət Komitəsindən APA-ya verilən məlumata görə, tədbiri Almaniyadakı Azərbaycanlıların Koordinasiya Mərkəzi Azərbaycanın Almaniyadakı səfirliyinin, Köln şəhər Bələdiyyəsinin mədəniyyət şöbəsinin və GEDOK təşkilatının dəstəyi ilə təşkil edir. Mərasim Köln şəhəri bələdiyyəsinin mədəniyyətlərarası əlaqələr şöbəsinin müdiri Johannes Bunk və AAKM-in icraçı direktoru Samira Patzer-Ismayilovanın çıxışı ilə başlanacaq.

Tədbiri VDR teleradioşirkətinin əməkdaşı, jurnalist Annette Hager aparacaq. Birinci hissədə “Azərbaycan qadını öz gözü ilə və Avropa kontekstində” mövzusu ətrafında diskussiya olacaq. İkinci hissədə isə “Azərbaycan” qəzetinin incəsənət və mədəniyyət şöbəsinin müdiri, yazıçı Flora Xəlilzadə və Diasporla İş üzrə Dövlət Komitəsinin “Ölkəm” jurnalının baş redaktoru, yazıçı Günel Rzayeva Azərbaycan qadınının bu günü ilə bağlı məruzələr təqdim edəcəklər.

Tədbirin “Azərbaycan qadınının ədəbiyyat və incəsənətdə rolu” adlı üçüncü bölümündə isə GEDOK-un sədri Christa Müller-Schlegelin çıxışı nəzərdə tutulub. Bununla yanaşı, ədəbiyyatşünas və aktrisa Judit Genske Azərbaycan ədəbiyyatı nümunələrindən parçalar səsləndirəcək. Pianoçu Elnarə İsmayılova Azərbaycanın qadın bəstəkarlarından Sevda İbrahimova və Firəngiz Əlizadənin bir neçə əsərini qonaqlara təqdim edəcək. Tədbirdə həmçinin Azərbaycan qadın rəssamları - Marqarita Sokolova-Kərimova və Ofeliya İmanovanın rəsmlərindən ibarət sərgi təşkil olunacaq.