Diaspor

Ana səhifə

Diaspor

Kölndə Azərbaycan qadınları ilə bağlı tədbir keçirilib

26 noyabr 2009 01:53 (UTC +04:00)

Bakı – APA. Almaniyanın Köln şəhərində “Ənənə və emansipasiya arasında - Şərqi Avropanın qadınları Azərbaycan qadını nümunəsində” adlı müsahibə, musiqi və poeziya axşamı keçirilib.

Diasporla İş üzrə Dövlət Komitəsindən APA-ya verilən məlumata görə, tədbiri Almaniyadakı Azərbaycanlıların Koordinasiya Mərkəzi Azərbaycanın Almaniyadakı səfirliyinin, Köln şəhər Bələdiyyəsi mədəniyyət şöbəsinin və Alman Qadın Sənətkarları Birliyinin (GEDOK) dəstəyi ilə təşkil edib.

Gecənin giriş sözü ilə açan Köln şəhəri Bələdiyyəsinin şöbə müdiri Johannes Bunk və AAKM-in icraçı direktoru Samirə Patzer-İsmayılova qonaqları salamlayıblar. AAKM-nin icraçı direktoru Azərbaycan qadınının müasir dövrdə əldə etdiyi müvəffəqiyyətlərin ən bariz nümunəsi olaraq Azərbaycan Respublikasının birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın siyasi, ictimai, mədəni, təhsil, səhiyyə və digər sahələrdə yorulmaz və uğurlu fəaliyyəti haqqında məlumat verib.

VDR teleradioşirkətinin əməkdaşı, jurnalist Annette Hagerin aparıcılıq etdiyi tədbirin birinci hissəsində “Azərbaycan qadını öz gözü ilə və Avropa kontekstində” mövzusunda diskussiya keçirilib. Berlin Humdold Universitetinin professoru xanım Dr. Eva-Maria Aux, Potsdam Universitetinin professoru Dr.Furman və digərləri bu mövzuda fikirlərini bölüşüblər.

İkinci hissədə isə Diasporla İş üzrə Dövlət Komitəsinin “Ölkəm” jurnalının baş redaktoru, yazıçı Günel Rzayeva Azərbaycan qadınının bu günü ilə bağlı məruzə təqdim edib, mövzu ətrafında suallara cavab verib.

Tədbirin “Azərbaycan qadınının ədəbiyyat və incəsənətdə rolu” adlı üçüncü bölümündə isə GEDOK-un sədri Christa Müller-Schlegelin çıxış edib. Sonra ədəbiyyatşünas və aktrisa xanım Judit Genske G.Rzayevanın Dağlıq Qarabağ münaqişəsindən bəhs edən “Ağac” hekayəsindən parçalar oxuyub. Pianoçu, Köln Musiqi Akademiyasının dosenti Elnarə İsmayılova isə Azərbaycan qadın bəstəkarlarından Sevda İbrahimova və Firəngiz Əlizadənin bir neçə əsərini qonaqlara təqdim edib. Tədbirdə həmçinin Azərbaycan qadın rəssamları Marqarita Sokolova-Kərimova və Ofeliya İmanovanın rəsmlərindən ibarət sərgi təşkil olunub.

Sonda qonaqlar Almaniyada fəaliyyət göstərən “Vahid Azərbaycan“ cəmiyyətinin hazırladığı Azərbaycan milli mətbəxinin nümunələrindən ibarət süfrəyə dəvət olunublar.