Diaspor

Ana səhifə

Diaspor

Moskvada “Bakıya məhəbbətlə” fotosərgisinin təntənəli açılışı olub - FOTOSESSİYA

Moskvada “Bakıya məhəbbətlə” fotosərgisinin təntənəli açılışı olub - <font color=red>FOTOSESSİYA</font>

27 noyabr 2009 09:53 (UTC +04:00)

Moskva. Roman Ağayev - APA. Moskvanın “Manej” Mərkəzi Sərgi Salonunda Rusiyanın tanınmış foto-rəssamı Georgi Pinxasovun “Bakıya məhəbbətlə” adlı fotosərgisinin təntənəli açılışı olub. APA-nın Moskva müxbirinin məlumatına görə, sərgi “Bakı” jurnalı, Moskva Fotoqrafiya Evi, Moskva Hökuməti və Moskva şəhər Mədəniyyət Departamentinin birgə təşkilatçılığı ilə baş tutub.

Moskva Fotoqrafiya Evinin direktoru Olqa Sviblova mərasimi sərginin təşkilinin təşəbbüskarı olan “Bakı” jurnalının bayramı adlandırıb.

Təntənəli mərasimdə açılış nitqi ilə çıxış edən “Bakı” jurnalının baş redaktoru, Heydər Əliyev Fondunun Rusiya nümayəndəliyinin rəhbəri, Rusiya Azərbaycanlı Gənclər Təşkilatının (RAGT) sədri Leyla Əliyeva jurnalın ilk sayının 2 il əvvəl işıq üzü gördüyünü xatırladıb: “Jurnalı nəşr etməkdə məqsədlərimizdən biri də oxucularımıza təkrarolunmaz Bakı mühitini, Bakı aurasını hiss etdirməkdir. Jurnalımızın səhifələrində biz Azərbaycan və onun paytaxtının tarixindən, mədəniyyətindən, adət-ənənələrindən, dahi, maraqlı taleyi, istedadı olan şəxslərindən söz açırıq. Bir sözlə, biz bakılılar haqqında yazırıq. O bakılılar ki, bu şəhəri sonsuz məhəbbətlə sevir və onun haqqında həmişə sevgi ilə danışırlar. Bu gecə də Bakıya məhəbbətin növbəti nümayişidir”.

Sonra L. Əliyeva tədbir iştirakçılarını istedadlı rəssam Georgi Pinxasovun əl işləri ilə tanış olmağa dəvət edib: “Bu insanın yaradıcılığı böyük incəsənətdir və mən şübhə etmirəm ki, bütün bu işləri o, böyük məhəbbətlə yaradıb – Bakıya məhəbbətlə...”

Azərbaycanın Rusiyadakı səfiri Moskvada belə bir sərginin təşkilinin sevindirici olduğunu deyib: “Biz fəxr edirik ki, Rusiyada “Bakı” kimi müasir və gözəl jurnal nəşr olunur. Bizim fəxrimiz olan bu jurnal Rusiyada böyük maraqla oxunur”.

Səfir gözəl usta və fotorəssam Pinxasovun Bakı haqqında möhtəşəm əsərlər yaratdığını qeyd edib: “Mən Bakını bu cür gözəl təqdim etdiyinə görə müəllifə, tədbirin təşkilatçılığına görə isə Leyla Əliyevaya və jurnalın redaksiyasına minnətdarlığımı bildirirəm”.

Tədbirdə çıxış edən G. Pisxasov da Bakının həqiqətən də gözəl şəhər olduğunu bildirib: “Mən gözəl, günəşli şəhər olan Bakını olduğunu kimi təqdim etməyə çalışdım və buna nail oldum. Buna nail olmaq isə çox gözəldir”.

Tədbirdə nağara ifaçısı Natiq Şirinovun rəhbərlik etdiyi “Natiq ritm qrupu” çıxış edib.

Fotosərgi dekabrın 13-dək davam edəcək.