Diaspor

Ana səhifə

Diaspor

ATƏT-in milli azlıqların işi üzrə baş komissarı Marneulidə olub - FOTOSESSİYA

ATƏT-in milli azlıqların işi üzrə baş komissarı Marneulidə olub - <font color=red> FOTOSESSİYA</font>

28 noyabr 2009 08:07 (UTC +04:00)

Marneuli. Nizami Məmmədzadə - APA. Noyabrın 27-də Gürcüstanın Marneuli şəhərindəki Mədəniyyət Mərkəzində ATƏT-in milli azlıqların işi üzrə baş komissarı Knut Vollebeklə görüş keçirilib. APA-nın Gürcüstan bürosunun məlumatına görə, görüşdə Kvemo-Kartli bölgəsində fəaliyyət göstərən QHT rəhbərləri və Ombudsman Aparatının bölgədəki nümayəndəsi iştirak edib.

K. Vollebek tutduğu vəzifənin 1992-ci ildən təsis edildiyini bildirib: “Biz hər dəfə görüşlərimizdə vurğulamışıq ki, azlıqlar öz dillərində təhsil almalı və dövlət dilini öyrənərək vətəndaşı olduqları ölkənin cəmiyyətinə inteqrasiya olmalıdır. Çalışırıq ki, azlıqların hüquqları yaşadıqları ölkələrin Konstitusiyasında təsbit edilsin. Onların ana dilində təhsili və mətbuatı olmalıdır. Biz milli azlıqların parlamentdə və yerli hakimiyyət strukturlarında təmsil olunması üçün hakimiyyət orqanları ilə iş aparırıq. Polislərlə bağlı da layihələr həyata keçiririk və onlara azlıqlarla necə davranmaq barədə treninqlər təşkil edirik”.

QHT rəhbərləri isə bölgədə televiziya və radionun olmadığını, təhsil sahəsində kadrların çatışmadığını, məktəblərdə Azərbaycan tarixi və coğrafiya fənlərinin tədris edilmədiyini, Azərbaycandilli məktəblərə bu dili bilməyən gürcülərin direktor göndərildiyini, Ermənistanla sərhəd kəndlərində yerli sakinlərin ermənilər tərəfindən incidildiyini ATƏT nümayəndəsinin nəzərinə çatdırılıblar.

K. Vollebek APA-nın problemlərin həlli üçün hansı addımların atılacağına dair sualına cavabında bildirib ki, bu məsələlərlə bağlı Gürcüstan hökuməti ilə birgə əlaqəli şəkildə işləyəcəklər: “Çox problemlər var. Mən hamını diqqətlə dinlədikdən sonra qərara gəldim ki, maarif sahəsində problemlər daha çoxdur. Biz hökumətə bu problemlərin vacib olduğunu bildirəcəyik, onların həllinə mütləq kömək edəcəyik. Düşünürəm ki, belə görüşlərimiz çox olacaq”.

Tədbirin sonunda Mədəniyyət Mərkəzinin sədri Fazil Həsənov Knut Vollebekə Heydər Əliyev Fondunun nəşr etdirdiyi “Muğam” albomunu bağışlayıb.