Diaspor

Ana səhifə

Diaspor

Almaniyada “Dağlıq Qarabağ-Azərbaycanın mədəniyyət beşiyi” adlı elmi-mədəni simpozium keçirilib

01 dekabr 2009 07:21 (UTC +04:00)

Bakı-APA. Berlində “Dağlıq Qarabağ-Azərbaycanın mədəniyyət beşiyi” adlı elmi-mədəni simpozium keçirilib. Azərbaycanın Almanisydakı səfirliyindən APA-ya verilən xəbərə görə, tədbir Berlin şəhərindəki Berlin-Brandenburq Elmlər Akademiyasında Dağlıq Qarabağın Azərbaycanlı İcması İctimai Birliyi və Almaniya-Azərbaycan Forumunun birgə səyi ilə baş tutub.
Tədbiri giriş sözü ilə Almaniya-Azərbaycan Forumunun sədri, Almaniyanın sabiq dövlət katibi Otto Hauzer açıb. Azərbaycanın Almaniyadakı səfiri Pərviz Şahbazov və Azərbaycan Milli Məclisinin deputatı, Dağlıq Qarabağın Azərbaycanlı İcması İctimai Birliyinin rəyasət heyətinin üzvü Rövşən Rzayev simpoziumda çıxış edib. Natiqlər uzun müddətdən bəri davam edən Ermənistan-Azərbaycan Dağlıq Qarabağ münaqişəsinin regionun inkişafı yolunda ciddi əngəl olduğunu, sabitliyə və davamlı sülhə təhlükə yaratdığını bildiriblər. Çıxışçılar Ermənistanın işğal etdiyi əzəli Azərbaycan torpağı Dağlıq Qarabağın Azərbaycan xalqı zəngin mədəni-tarixi irsinin ayrılmaz və çox mühüm bir parçası olduğunu faktlarla göstəriblər.

Daha sonra Bakı Slavyan Universitetinin rektoru Kamal Abdulla “Dağlıq Qarabağ Azərbaycanın tarixində” adlı elmi məruzə ilə çıxış edib.
Çıxışlardan sonra “Dağlıq Qarabağ münaqişəsi - bundan sonra necə olacaq” adlı dəyirmi masa keçirilib. O. Hauzerin moderatorluq etdiyi dəyirmi masada Almaniya tərəfindən AFR Xarici İşıər Nazirliyinin vaxtilə ATƏT-in Minsk Qrupundakı nümayəndəsi, keçmiş səfir F. Lambax, Bundestaqın sabiq üzvü, hazırda AŞ PA-da Almaniya nümayəndə heyətinin üzvü E. Lintner, Azərbaycan tərəfindən isə Kamal Abdulla, Bakı Musiqi Akademiyasının rektoru F. Bədəlbəyli və millət vəkili R. Rzayev iştirak ediblər. Müzakirələrdə Dağlıq Qarabağın Azərbaycanla bağlılığından geniş bəhs edilib.
Müzakirələrdə Ermənistanın konstruktiv mövqe nümayiş etdirərək işğal etdiyi Azərbaycan ərazilərini boşaltması təqdirində regional inkişafa və əməkdaşlığın təmin edilməsinə xidmət edəcəyi bildirilib. Tədbirdə Almaniya Bundestaqının, müxtəlif dövlət qurumlarının, beyin mərkəzlərinin, KİV-in, Almaniyada akkreditə olunmuş diplomatik korpusun nümayəndələri, habelə Almaniyadakı Azərbaycan diasporasının fəalları iştirak etmişlər.