Diaspor

Ana səhifə

Diaspor

Berlin və Cenevrədə silahlı münaqişələr zamanı insan hüquqlarının kütləvi pozulması problemlərinə həsr olunmuş beynəlxalq konfranslar keçiriləcək

08 dekabr 2009 07:51 (UTC +04:00)

Bakı-APA. BMT İnsan Haqları günü ilə əlaqədar olaraq Dialoq və Əməkdaşlıq uğrunda İslam Konfransı Gənclər Forumunun (DƏ-İKGF) dəstəyi ilə dekabrın 10-da Berlin və Cenevrədə silahlı münaqişələr zamanı insan hüquqlarının kütləvi pozulması problemlərinə həsr olunmuş beynəlxalq konfranslar keçiriləcək. Bu barədə APA-ya DƏ-İKGF Media Departamentindən bildirilib. Məlumata görə, konfranslar DƏ-İKGF Mədəniyyətlərarası Dialoq üzrə Baş Koordinatoru Leyla Əliyevanın təşəbbüsü ilə 8 may 2008-ci ildə elan edilmiş “Xocalıya Ədalət” (Justice for Khojaly) beynəlxalq məlumat və təşviqat kampaniyası çərçivəsində keçiriləcək. Kampaniyanın məqsədi Xocalı şəhərində törədilmiş insanlığa qarşı cinayətin dünya ictimaiyyətinə çatdırılması və dünya ictimaiyyəti tərəfindən bu cinayətə hüquqi-siyasi qiymətin verilməsinə nail olmaqdır.
DƏ-İKGF İstanbul ofisindən bildirilib ki, sırf diaspor tədbirləri çərçivəsindən kənara çıxan bu konfranslar öz xarakterinə görə həm miqyası, həm də Avropa ölkələrinin vətəndaş cəmiyyəti nümayəndələrinin cəlb olunma səviyyəsi baxımından ilk dəfə keçirilən tədbirlər sırasındandır”.
Cenevrədəki konfrans BMT-nin Cenevrə qərargahının insan haqları gününə həsr olunmuş tədbirləri çərçəivəsində “Silahlı münaqişələr və insan haqları” adı altında BMT-nin Cenevrə qərargahının Millətlər Sarayında (“Palais des Nations”) keçiriləcəkdir. Tədbirdə diplomatların, Avropanın müxtəlif ölkələrindən olan insan haqlarının müdafəsi ilə bağlı təşkilat rəhbərləri və kampaniyanın fəallarlnln iştirakı planlaşdırılıb.
Konfrans zamanı Xocalıda törədilmiş qətliam 2-ci dünya müharibəsinin gedişində nasistlər tərəfindən insanlığa qarşı törədilmiş cinayətlərlə, Srebrenitsa və Ruandada həyata keçirilmiş soyqırımlarla yanaşı müzakirə ediləcək.
Eyni gündə Berlin şəhərində Bundestaqın sabiq deputatı cənab Eduard Lintnerin təşəbbüsü ilə Qubanın azərbaycanlı və yəhudi əhalisinə qarşı 1918-ci ildə erməni daşnakları tərəfindən törədilmiş qətliama həsr edilmiş 3 günlük beynəlxalq konfrans öz işinə başlayacaq.

Tədbir zamanı həmçinin kampaniyanın Xocalı qətliamını və bu kimi digər qətliamları pisləyən bəyannaməsinə imzalar toplanacaq.
Bu konfranslar hər iki tədbir zamanı Xocalı qətliamının beynəlxalq tanınması probleminin müzakirəsi və bu istiqamətdə Avropa ölkələrində iş aparmaq üçün konkret tövsiyələrin hazırlanması baxımından xüsusi əhəmiyyət kəsb edir.