Diaspor

Ana səhifə

Diaspor

Yelena Tevdoradze: “Diasporla iş üzrə dövlət nazirinin Gürcüstanda yaşayan azərbaycanlıları diaspor adlandırmasına çox təəssüflənirəm”

19 dekabr 2009 11:22 (UTC +04:00)

Tiflis. Nizami Məmmədzadə - APA. Gürcüstanın diasporla iş üzrə dövlət naziri Yulon Qaqoşidzenin yerli telekanallarından birində etdiyi çıxış narazılıqla qarşılanıb. Dövlət naziri dekabrın 16-da etdiyi çıxışında bildirib ki, Gürcüstan yalnız gürcü və abxazların vətənidir, burada yaşayan azərbaycanlılar, ermənilər, osetinlər isə diaspor sayılırlar.

Gürcüstanın reinteqrasiya məsələləri üzrə dövlət nazirinin müavini Yelena Tevdoradze isə APA-ya açıqlamasında Y. Qaqoşidzenin çıxışını onun şəxsi düşüncəsi adlandırıb: “Dövlətin mövqeyi onun mövqeyi ilə üst-üstə düşmür. Diaspor başqa məna kəsb edir, milli azlıq başqa... Biz prezident Mixail Saakaşvilinin tapşırığına əsasən, “Tolerantlığın və mülki inteqrasiyanın milli konsepsiyası” planı hazırlamışıq. Bu plan 5 il müddətinə nəzərdə tutulub. Layihədə göstərilən hər bir müddəa əsasında nazirlik və dövlət idarələri də 5 illik plan hazırlayıb. Bu planda Gürcüstan vətəndaşlarına, xüsusən qeyri-gürcü əhalisinə yardım nəzərdə tutulub. Sənəddə qeyd olunub ki, Gürcüstanda yaşayan azərbaycanlılar, ermənilər, ruslar, ləzgilər və digər milli azlıqlar bir vətəndaş kimi özlərini Gürcüstan cəmiyyətində azad və rahat hiss etməlidirlər. Eyni zamanda biz istəyirik ki, milli azlıqlar dövlət qarşısında məsuliyyət hiss etdikləri kimi, dövlətin onlara qayğısını da hiss etsinlər. Bütün bunlardan sonra Yulon Qaqoşidzenin bu cür ifadələr işlətməsinə çox təəssüf edirəm”.

Y. Tevdoradze azərbaycanlıların aborigen olaraq tarixən bu torpaqlarda yaşadıqlarını da qeyd edib: “Gürcüstan torpağı tarix boyu burada yaşamış vətəndaşların vətənidir. Onlar burada gürcülərlə bir yerdə yaşayıblar və yaşayacaqlar”