Diaspor

Ana səhifə

Diaspor

Avropadakı Azərbaycan diaspor təşkilatları ABŞ prezidentinə müraciət edib

21 dekabr 2009 19:15 (UTC +04:00)

Bakı – APA. Avropa Azərbaycanlıları Konqresi (AAK) ABŞ prezidenti Barak Obamaya müraciət ünvanlayıb.

APA-nın məlumatına görə, müraciətdə bildirilir ki, ABŞ Konqresi Nümayəndələr Palatasının Dağlıq Qarabağdakı separatçı rejimə 2010-cu il üçün 8 milyon dollar maliyyə yardımının ayırması Avropada yaşayan bütün azərbaycanlıları narahat edir.

“Azərbaycanın Dağlıq Qarabağ regionu ətraf rayonlarla birlikdə Ermənistanın işğalı altındadır. ATƏT-in Minsk Qrupunun həmsədrlərindən biri olan ABŞ-ın Azərbaycanın ərazi bütövlüyünü dəstəkləməklə bağlı mövqeyi ilə Dağlıq Qarabağ separatçılarına müxtəlif yardımlar göstərməsi tamamilə bir-birinə ziddir” – deyə sənəddə vurğulanır.

İsveçdə fəaliyyət göstərən Azərbaycan diaspor təşkilatları da ABŞ prezidenti Barak Obamaya müraciət ünvanlayıb. Müraciətdə İsveç Krallığında fəaliyyət göstərən “Azərbaycan Naminə”, “Vətən” və “Odlar Yurdu” cəmiyyətləri tərəfindən ABŞ Konqresinin işğalçı Ermənistana və separatçı Dağlıq Qarabağa 2010-cu il üçün maliyyə yardımının ayırmasına etiraz bildirilib.

“Dağlıq Qarabağ Ermənistan tərəfindən işğal olunmuş torpaqdır və maliyyə dəstəyinin göstərilməsi ABŞ-ın beynəlxalq nüfuzuna xələl gətirməkdən başqa bir şey deyil” - deyə müraciətdə vurğulanır.

Daha sonra müraciətdə bildirilir: “Biz ümid edirik ki, Siz dünyada sülhün və demokratiyanın tərəfdarı kimi bizim narazılığımızı başa düşüb, Vətənimizin işğalçılarını dəstəkləyən qərarın ABŞ hökuməti tərəfindən qəbul edilməsinə imkan verməyəcəksiniz. Dağlıq Qarabağ Azərbaycanın ürəyidir və biz ümid edirik ki, BMT tərəfindən qəbul edilən 4 qətnaməyə uyğun bizim torpaqlarımız işğalçılardan azad olunacaq”.