Diaspor

Ana səhifə

Diaspor

Estoniya və İsveç azərbaycanlıları ABŞ Konqresinə müraciət edib

22 dekabr 2009 00:28 (UTC +04:00)

Bakı – APA. “Aydan” Eston-Azərbaycan Mədəniyyət Mərkəzi Estoniyada yaşayan azərbaycanlılar adından ABŞ Konqresinə müraciət ünvanlayıb.

Mərkəzdən APA-ya verilən məlumata görə, müraciətdə ABŞ Konqresinin Dağlıq Qarabağa 8 mln. dollar maliyyə yardımı ayrılması barədə büdcə layihəsindən narahatlıq bildirilir.

Məktubda qeyd olunur ki, Estoniyada yaşayan azərbaycanlılarının bir çoxu Ermənistan tərəfindən işğal olunmuş Dağlıq Qarabağ və ətraf rayonların sakinləridir: “Onlar Xocalı soyqırımını törətmiş, Azərbaycan ərazisinin 20%-ni zəbt etmiş, bir milyon insanı öz torpağından didərgin salmış separatçı rejimə ABŞ-ın maddi dəstək verməsini etirazla qarşılayırlar”.

Müraciətdə həmçinin bildirilir ki, Azərbaycan terrora qarşı mübarizədə ABŞ-ın etibarlı tərəfdaşıdır və əgər Dağlıq Qarabağdakı separatçı rejimə maliyyə yardımı ayrılması barədə qərar təsdiq olunarsa, bu, ABŞ-ın bütün dünya azərbaycanlılarının təsəvvüründə formalaşmış imicinə mənfi təsir edə bilər.

Müraciəti ABŞ-ın Estoniyadakı səfirliyinə təqdim edilib.

İsveç Azərbaycan Federasiyası da separatçı rejimə yardım ayrılmasından narahatdır. Federasiyanın yaydığı müraciətdə bildirilir ki, ATƏT-in Minsk Qrupu həmsədrlərindən biri olan ABŞ-ın Azərbaycanın ərazi bütövlüyünü dəstəkləməklə bağlı mövqeyi ilə Dağlıq Qarabağ separatçılarına müxtəlif yardımlar göstərməsi tamamilə bir-birinə zidd olan mövqedir.