Diaspor

Ana səhifə

Diaspor

Almaniyanın “Aleks” televiziyasında həftədə iki saat Azərbaycanla bağlı verilişin yayımına başlanılıb

24 dekabr 2009 06:19 (UTC +04:00)

Bakı. Ülkər Qasımova – APA. Almaniyanın “Aleks” televiziyasında həftədə iki saat Azərbaycanla bağlı verilişin yayımına başlanılıb.

Bu barədə APA-ya məlumat verən həmyerlimiz, eləcə də bu verilişin layihə rəhbəri Naibə Tural bildirib ki, həftədə iki saat müddətində yayımlanan “Vətənim” adlı veriliş Azərbaycan dilində yayımlanır.

Onun sözlərinə görə, bu verilişi hazırlanmaqda məqsəd Azərbaycanın mədəni sərvətlərinin dünya ictimaiyyətinə tanıtmaqdır: “Veriliş bu ilin noyabrından etibarən yayımlanmağa başlanılıb və hər veriliş Azərbaycanın mədəniyyəti və tarixinə həsr olunub. İlk verilişimi Azərbaycanın himni ilə başladım. Daha sonra Üzeyir Hacıbəyovun uvertürası üzərində Azərbaycanla bağlı maraqlı süjet hazırladım. Eyni zamanda Azərbaycanın tanınmış simaları Elçin Əfəndiyev, Oqtay Mirqasımovun müsahibələrini də ötən verilişlərdə təqdim etmişəm. Almaniyada yaşayan azərbaycanlılarımızla da müsahibələrə yer verirəm. Xalq mahnılarımızın yığılmasında mənə İctimai Televiziya və Radio Verilişləri Şirkətinin rəhbərliyi yaxından kömək olur. Verilişlər Azərbaycan dilində hazırlansa da sinxron olaraq alman dilinə tərcümə olunur və bu işdə də mənə Almaniyada yaşayan həmyerlilərimiz yaxından yardım edirlər. Ümumiyyətlə, Azərbaycana həsr etdiyimiz ”Vətənim” verilişinin bütün yaradıcı kollektivi əsasən öz həmvətənlərimizdən ibarətdir”.

N.Tural qeyd edib ki, budəfəki səfəri müddətində Azərbaycan Yazıçılar Birliyinin sədri, xalq yazıçısı Anarla görüşmək, bu veriliş üçün Azərbaycan Dövlət İncəsənət və Dövlət Xalça və Xalq tətbiqi sənəti Muzeyində çəkilişlər aparmaq niyyətindədir: “Bu çəkilişlər zamanı Qafqaz xalçası kimi dünyada tanınan Azərbaycan xalçalarını Azərbaycana məxsus olduğunu göstərmək, düşmənlərimiz tərəfindən özününküləşdirilən milli mədəniyyət nümunələrinin əslində Azərbaycana məxsus olduğunu duyurmaq niyyətindəyəm”.