Diaspor

Ana səhifə

Diaspor

Almaniyada Dağlıq Qarabağ münaqişəsinə həsr olunan tədbir keçirilib - FOTO

Almaniyada Dağlıq Qarabağ münaqişəsinə həsr olunan tədbir keçirilib - <font color=red>FOTO</font>

04 fevral 2010 10:18 (UTC +04:00)

Bakı-APA. Berlində Almaniyadakı Azərbaycanlıların Koordinasiya Mərkəzinin (AAKM) təşkilatçılığı ilə Dağlıq Qarabağ münaqişəsinə həsr olunmuş tədbir keçirilib. Diasporla İş üzrə Dövlət Komitəsinin mətbuat xidmətindən APA-ya verilən məlumata görə, Azərbaycanın Almaniyadakı Səfirliyinin nümayəndələrinin də qatıldığı tədbirin məqsədi bir daha Dağlıq Qarabağ münaqişəsi barədə alman ictimaiyyətini məlumatlandırmaq, reallıqları davamlı şəkildə təbliğ etmək olub. Toplantıda AAKM-in icraçı direktoru Samirə Patzer-İsmayılova „Sülhə ümid və ya siyasi-coğrafi məngənə. Dağlıq-Qarabağ münaqişəsi 2010-cu ildə” mövzusunda məruzə ilə çıxış edib. O qeyd edib ki, Dağlıq-Qarabağ münaqişəsi keçmiş Sovet İttifaqı ərazisində baş verən və qurbanların sayına görə birinci yerdə duran münaqişədir.
S. Patzer-İsmayılova bildirib ki, Qarabağ müharibəsi 30 mindən çox azərbaycanlının ölümünə, 1 milyon azərbaycanlının ata-baba yurdundan didərgin düşməsinə səbəb olub.

AAKM-in icraçı direktoru öz çıxışında münaqişənin həlli istiqamətində Azərbaycan və Ermənistan dövlət başçılarının apardığı danışıqlar, beynəlxalq birliyin bu məsələyə dair mövqeyi, Ermənistanın münaqişənin həllinə qeyri-konstruktiv yanaşması və özu özunu elan etmiş qondarma Dağlıq Qarabağ rejimini himayə etməsi və dəstəkləməsi, Azərbaycanın Dağlıq Qarabağa ən yüksək özünüidarə statusu verməyə hazır olması, eləcə də Cənubi Qafqazdakı digər münaqişəli ocaqlar barədə də danışıb.

Tədbirdə iştirak edən tanınmış siyasətşünas Hayko Langner isə Dağlıq-Qarabağ münaqişəsinin həlli yolları, Qafqazın geosiyasi vəziyyətinin aktuallığı və bu amilin münaqişənin həllinə təsir imkanları barədə çıxış edib.
Sonra məruzəçilər tədbir iştirakçılarının suallarını cabavlandırıblar.