Diaspor

Ana səhifə

Diaspor

Moskvada «Azərbaycan ailəsi. Adət və ənənələr» mövzusunda gecə keçirilib

16 fevral 2010 21:57 (UTC +04:00)

Moskva. Roman Ağayev – APA. Ümumrusiya Azərbaycanlılar (ÜAK) Konqresinin Moskva regional şöbəsi «Müxtəlif millətlərdən olan Moskva ailələri» layihəsi çərçivəsində «Azərbaycan ailəsi. Adət və ənənələr» mövzusunda gecə keçirib. Tədbir Moskva Millətlər Evində (MME) baş tutub.

Tədbiri giriş sözü ilə açan MME direktoru Pyotr Lempert Azərbaycanın milli mədəniyyətinin böyük tarixə malik olduğunu və dünyanın ən zəngin mədəniyyətlərindən biri olduğunu vurğulayıb.

Azərbaycanın Rusiyadakı səfirliyinin beynəlxalq-hüquqi və diaspor məsələləri üzrə müşaviri Ağalar Atamoğlanov hər bir Azərbaycan ailəsində adət-ənənələrin yaşadığını və nəsildən-nəslə ötürüldüyünü bildirib.

ÜAK icraçı direktorunun müavini İlqar Hacıyev Konqresin əsas fəaliyyət istiqamətlərindən birinin Rusiyada yaşayan azərbaycanlıların adət və ənənələrinin qorunub saxlanması olduğunu qeyd edib. «Gənc nəslin onları unutmaması və nəsildən-nəslə ötürməsi, həmçinin digər millət və mədəniyyətlərin nümayəndələrini onunla tanış etməsi vacibdir. Bununla onlar çoxmillətli Rusiyada mədəniyyətlərin qarşılıqlı zənginləşməsinə töhfə vermiş olacaqlar», deyə İ.Hacıyev vurğulayıb. O ÜAK adından MME-yə xatirə suveniri və Azərbaycan xalqının ümummilli lideri Heydər Əliyev haqqında kitabları hədiyyə edib.

Sonda Moskva şəhər 157 saylı orta məktəbinin «Odlar yurdu» ansamblı və Moskvanın «Dərviş» teatrının kollektivi qonaqlara «Azərbaycan toyu» mövzusunda səhnələşdirilmiş tamaşanı təqdim ediblər. Tamaşa dahi Üzeyir Hacıbəyovun ölməz «Arşın mal alan» əsərinin əsasında hazırlanıb.