Diaspor

Ana səhifə

Diaspor

Gürcüstanda qasırğanın nəticələri aradan qaldırılır

24 fevral 2010 02:11 (UTC +04:00)

Tiflis. Nizami Məmmədzadə-APA. Qasırğa nəticəsində Qərbi Gürcüstan, o cümlədən Kvemo-Kartli, Kaxeti, Msxeta-Mtianeti və Şida Kartli bölgələri ciddi ziyan çəkib.

APA-nın Gürcüstan bürosunun məlumatına görə, bu barədə hökumətin iclasında regionların inkişafı və infrastrukturlar naziri David Tkeşelaşvili bildirib. Onun sözlərinə görə, yerli hakimiyyət orqanları qasırğanın nəticələrini aradan qaldırırlar. Qeyd edək ki, qasırğa azərbaycanlılar yaşayan kəndlərə də ziyan vurub, əhalinin kənd təsərrüfatı bitkiləri becərdiyi istixanaların salafan örtüyünü güclü külək aparıb. Marneuli şəhərində külək bir neçə idarə və təhsil ocaqlarının dam örtüyündən şiferləri qoparıb atıb.

Baş nazir Nika Gilauri isə bildirib ki, təbii fəlakət nəticəsində zərər çəkmiş bütün obyektlərin bərpa olunması üçün maliyyə ayrılacaq: “Digər regionlar kimi, Tiflis şəhərində də 150-dək yaşayış binasının dam örtüyünü qasırğa aparıb. Bütün binaların bərpası hökumət tərəfindən ayrılmış vəsait hesabına həyata keçiriləcək”.

Baş nazirin dediyinə görə, hələlik qasırğanın vurduğu ziyanın nəticələri hesablanmayıb.

Xatırladaq ki, fevralın 22-də baş verən güclü qasırğa nəticəsində Tiflis şəhərində 2 nəfər həlak olub, bir neçə nəfər yaralanıb. Qeyd edək ki, təbii fəlakət nəticəsində Kaspi rayonunun Tatuşağı kəndində yaşayan soydaşımızın “Mersedes” markalı maşınının üstünə ağac aşması nəticəsində sürücü Ziyəddin Məmmədov hadisə yerindəcə dünyasını dəyişib, onun ailə üzvləri isə xəstəxanaya çatdırılıblar.