Diaspor

Ana səhifə

Diaspor

Heydər Əliyev adına Gürcüstan-Azərbaycan Humanitar Universitetində Xocalı hadisələri yad edilib

25 fevral 2010 20:30 (UTC +04:00)

Marneuli. Nizami Məmmədzadə-APA. Bu gün Marneulidə fəaliyyət göstərən Heydər Əliyev adına Gürcüstan-Azərbaycan Humanitar Universitetində Xocalı hadisələri ilə bağlı anım tədbiri keçirilib. Tədbiri universitetin rektoru Novruz Bayramov açaraq Xocalı soyqırımı haqqında tədbir iştirakçılarına ətraflı məlumat verib, bu qanlı günün Azərbaycan xalqının tarixində həmişə anılacağını, yaddaşlardan silinməyəcəyini vurğulayıb. Sonra Xocalı şəhidlərinin xatirəsini yad etmək üçün bir dəqiqəlik sükut elan edilib.

Tədbirdə universitetin müəllimi, yazıçı Əli Abbas, Marneuli Rayon Bələdiyyəsinin sədri Ayvaz İsmayılov, Gürcüstan parlamentinin keçmiş deputatı Hidayət Hüseynov, tələbələrdən Elnarə Fərəcova, Lətafət Kərimova, Ayna Ramazanzadə, əslən Qarabağdan olan tələbə Gülnar Quliyeva və başqaları Xocalı hadisələrinin müasir dövrdə necə təbliğ olunmasından, bu ağrının zaman-zaman yaddaşlardan silinməyəcəyindən, dəhşətli erməni vandalizmin dünyada törətdiyi bədnam hadisələrin getdikcə çoxalmasından və bu hadisəyə hələ də hüquqi qiymətin verilməməyindən, xalqımızın tarixi salnaməsinə şəhid al-qanı ilə yazıldığından, onu gələcək nəsillərə ötürəcəklərindən söhbət açıblar.

Rektor Novruz Bayramov APA-ya açıqlamasında bildirib ki, Xocalı bədnam ermənilərin əvvəlcədən planlaşdırdığı ən dəhşətli soyqırımdır: «Bunu heç vaxt unutmaq olmaz. Ona görə də kollektivimiz İslam Konfransı Təşkilatı Gənclər Forumunun Mədəniyyətlərarası Dialoq üzrə baş koordinatoru Leyla Əliyevanın «Xocalıya Ədalət» şüarı ilə bağlı beynəlxalq kampaniyaya başlanılması barədə təşəbbüsünü dəyərləndirir. Bu, Azərbaycan xalqının haqq işidir, öz torpaqlarının azad olunması yolunda qətiyyətinin mübariz səsidir. Biz Xocalı dərdini, kədərini heç vaxt unutmayacağıq».

Tədbirdə universitetin professor və müəllim heyəti, azərbaycanlı və gürcü ziyalıları, jurnalistlər iştirak edib.

Tədbirin axırında iştirakçılara Xocalı barədə film nümayiş etdirilib.