Diaspor

Ana səhifə

Diaspor

Fransa Senatının yaxınlığında Xocalı soyqırımına həsr olunmuş aksiya keçirilir

26 fevral 2010 08:56 (UTC +04:00)

Bakı-APA. Bu gün yerli vaxtla saat 9.00-dan 13.00-a qədər Parisin Pol Klodel meydanında (Senat yaxınlığında) “İRƏLİ” İctimai Birliyinin, Azərbaycan Fransız Gənclik Təşkilatının və Fransadakı Azərbaycan səfirliyinin təşkilatçılığı ilə Xocalı soyqırımının 18-ci ildönümünə həsr olunan aksiya keçiriləcək. Bu barədə APA-ya “İRƏLİ” İctimai Birliyinin mətbuat katibi Aynur Həsənzadə bildirib. Məlumata görə, aksiyanın keçirilməsində məqsəd Fransız senatını məsələdən agah etmək və onun gələcək iclaslarında Xocalı faciəsini müzakirələrə çıxarmaqdır. Aksiya Fransanın Tuluz, Strasburq, Nant, Bezanson, Marsel, Nansi, Lyon, Paris və s. kimi 10-a yaxın fransız şəhərlərindən Parisə toplanan 150 - ə qədər gəncin iştirakı ilə keçiriləcək.
Aksiya iştirakçıları üçün “İRƏLİ” İctimai Birliyi tərəfindən xüsusi köynəklər və aksiyada istifadə ediləcək şüarları əks etdirən posterlər hazırlanıb. Tədbirdə istifadə olunacaq kitablar və broşuralar Heydər Əliyev Fondu tərəfindən təqdim edilib. Bu ilki aksiyanın daha fərqli xüsusiyyətlərin biri də daha çox gənci əhatə etməsi və və çox sayda Fransada təhsil alan xarici tələbələrin iştirakının təmin edilməsidir. Aksiya zamanı erməni terrorizminə, Xocalı Soyqırımına Fransa ictimaiyyətinin və beynəlxalq təşkilatların diqqətinin cəlb edilməsi və Fransa Senatının Xocalı Soyqırımını tanıması məqsədi ilə şüarlar səsləndiriləcək.
Aksiya bitdikdən dərhal sonra, aksiya iştirakçıları müxtəlif qruplara ayrılaraq Parisin bir neçə yerli əhalinin daha çox olduğu yerlərdə yerli ictimaiyyətin nümayəndələrinə Xocalı qətliamının reallıqlarını və Erməni vəhşiliklərini özündə əks etdirən kiçik kitabçalar və bukletlər paylayacaq.
Bundan əlavə, Aksiyanın kütləvi informasiya vasitələrində işıqlandırılması üçün Fransada onlarla televiziya və radio qurumlarına, müxlətif elektron informasiya agentliklərinə və qəzetlərə məlumat verilib.
Aksiya dinc xarakter daşıyaraq, nəzərdə tutulmuş yerdə meqofonla şüarların deyilməsi, traktların və kitabların insanlara paylanması və sonda bəyannamənin Senata verilməsi ilə bitəcək.
Aksiya zamanı milli bayraqlarımızla yanaşı fransız bayraqları dalğalanacaq.