Diaspor

Ana səhifə

Diaspor

Corc Vaşinqton Universitetində Xocalı qətliyamına həsr olunmuş konfrans keçirilib

26 fevral 2010 12:21 (UTC +04:00)

Vaşinqton. İzabel Levin-APA. Fevralın 25-də Vaşinqtonda Corc Vaşinqton Universitetində Xocalı qətliyamına həsr olunmuş konfrans keçirilib. APA-nın Vaşinqton müxbirinin məlumatına görə, konfrans Azərbaycan-Amerika Şurası (AAC), Azərbaycan-Amerika Cəmiyyəti (ASA), Türk-Amerika Assosiasiyaları Assembleyası (ATAA), Corc Vaşinqton Universitetinin Türk Tələbələr Assosiasiyası, Vaşinqtondakı Türk-Amerika Assosiasiyası (ATA-DC) və Azərbaycan-Amerika Tələbə Assosiasiyası (AASA) tətəfindən təşkil olunub.

Azərbaycanın ABŞ-dakı səfiri Yaşar Əliyev konfransda çıxış edərək bildirib ki, Xocalı 20-ci əsrdə dünyada baş verən ən böyük qətliyamdır.

O deyib ki, Azərbaycanın Dağlıq Qarabağ bölgəsində bir vaxtlar Azərbaycanlıların yaşadığl səhər olan Xocalı 1992-ci il fevralın 25-dən 26-a keçən gecə erməni qüvvələri tərəfindən işğal olunub. Şəhər əhalisi isə işğalçılar tərəfindən etnik təmizləməyə və qətliyama məruz qalıblar. 613 azərbaycanlı və Ahıska türkü, o cümlədən 106 qadın və 83 uşaq öldürülüb. Bu məlumat “Human Rights Watch”dan götürülüb.

Tədbirdə ABŞ hip hop ifaçısı Toni Bləkmən və Azərbaycanın məşhur rep qrupu “Dəyirman” tərəfindən ifa olunan, Grammy mükafatçısı Qordon Uilyamsın prodüser olduğu və İKT-ın “Xocalıya Ədalət” kampaniyasının dəstəyi ilə hazırlanmış “Xocalıya Ədalət” klipi təqdim olunub.

Cənab Yaşar Əliyev tədbirin təşkilatçılarına, həmçinin İslam Konfransı Gənclər Forumunun baş koordinatoru Leyla Əliyevanın rəhbərlik etdiyi Xocalıya Ədalət beynəlxalq kampaniyasına təşəkkürünü bildirib.

Amerika Azərbaycan Cəmiyyətinin sədri Tomris Azəri, ABŞ Dövlət Departamenti tərəfindən seçilmiş musiqi səfiri və “Xocalıya ədalət” mahnısının müəllifi Toni Bləkmən və Grammy mükafatçısı Qordon Uilyams konfransda çıxış ediblər.

Tomris Azəri Xocalı qətliyamının Azərbaycan kimliyinə təsiri barədə danışıb. O, Markar Melkonyanın “Qardaşımın yolu” adlı kitabından sitat gətirərək ASALA terroçusu Monte Melkonyanın dili ilə Xocalı cinayətinin etiraf edildiyini bildirib.

Toni Bləkmən və Qordon Vilyams Azərbaycanın Ağcabədi rayonunda qaçqın düşərgələrinə baş çəkmələrindən danışıblar.

“Xocalıya ədalət” klipinin təqdimatı tamaşaçılar tərəfindən maraqla qarşılanıb. Jurnalist və millət vəkili Qənirə Paşayeva tərəfindən Heydər Əliyev Fondunun dəstəyi ilə hazırlanan Xocalı haqqında sənədli film də tədbirdə nümayiş olunub.

AAC, ASA və ATAA fevralın 26-da BMT-nin ofisi qarşısında aksiya, fevralın 27-də Nyu-York Universitetinin Politexnik İnstitutunda ictimai təqdimatla Xocalı kampaniyası həftəsini və Pax Turcica əhalinin siyahıya alınması ilə bağlı seminarları davam etdirəcək.