Diaspor

Ana səhifə

Diaspor

Gürcüstanda yaşayan soydaşlarımız ABŞ Konqresinin Xarici Əlaqələr Komitəsinin qəbul etdiyi qətnaməyə münasibət bildiriblər - FOTOSESSİYA

Gürcüstanda yaşayan soydaşlarımız ABŞ Konqresinin Xarici Əlaqələr Komitəsinin qəbul etdiyi qətnaməyə münasibət bildiriblər - <font color=red>FOTOSESSİYA</font>

06 mart 2010 21:15 (UTC +04:00)

Marneuli. Nizami Məmmədzadə-APA. Martın 6-da Gürcüstanda soydaşlarımızın kompakt yaşadığı Marneuli şəhərindəki Azərbaycanlıların Mədəniyyət Mərkəzində ABŞ konqresi Nümayəndələr Palatasının Xarici Əlaqələr Komitəsinin uydurma «erməni soyqırımı» ilə bağlı qəbul etdiyi qətnamə ilə bağlı tədbir keçirilib.

APA-nın Gürcüstan bürosunun məlumatına görə, ictimaiyyət, qeyri hökumət nümayəndələri və gənclərin iştirak etdiyi tədbiri mərkəzin rəhbəri Fazil Həsənov açaraq qeyd edib ki, bu qətnamə erməniləri fəlakətə sürükləyəcək. Tədbirdə Gürcüstan Tarixçilər Assosiasiyasının üzvü Nərgiz Nəbiyeva çıxış edərək 1915-ci il hadisələri barədə tarixi faktları sadalayıb, Sonra tədbir iştirakçılarından jurnalist Əbdüləli İbrahimsoy, şair Əlixan Yəhyaoğlu, Tiflisdə təhsil alan tələbələrdən Elida Muxayeva, Namiq Məmmədov, Ağəli Qocayev, Mədəniyyət Mərkəzinin təhsil şöbəsinin müdiri Mikayıl Mustafayev, Gürcüstan Azərbaycanlıları Elmi Araşdırmalar Assosiasiyasının prezidenti Ehtiram Əmirxanlı və başqaları çıxış edərək əsası olmayan və yalan məlumatlara söykənərək türkçülüyə zərbə vuran qətnaməni pisləyərək ermənilərin törətdikləri Xocalı soyqırımında 613 nəfərin həlak olduğunu, bu qanlı hadisəyə hələ də qiymət verilmədiyini vurğulayıblar.

Azərbaycanlıların Mədəniyyət Mərkəzinin rəhbəri Fazil Həsənov APA-ya açıqlamasında bildirib ki, erməni lobbisi istəyinə nail ola bilməyəcək: «Bu qətnamə erməniləri fəlakətə aparır. Qondarma «erməni soyqırımı» barədə biz çox oxumuşuq. Görəsən, ABŞ konqresmenləri dünyanın görkəmli tarixçi alimlərinin söylədiyi fikirləri oxumayıblar? Xaricdə olan erməni lobbisi öz pullarına arxalanıb belə yalançı və uydurma «soyqırımı»nı dəridən-qabıqdan çıxaraq irəli sürürlər. Tarixin təkəri heç vaxt geriyə hərlənə bilməz. Ermənilər, eləcə də Ermənistan hökuməti həm iqtisadi, həm də siyasi cəhətdən zəiflədiklərini görüb, saman çöpündən yapışmağa başlayıblar. Bu «soyqırım» kələklə gəlib, küləklə gedəcək. Dünya ictimaiyyətinin, eləcə də Amerikanın ağıllı adamları onu silib atacaqlar. Ədalət mütləq qalib gələcək».

Tədbirdə Qardabanidən, Bolnisdən, Marneulinin yaxın kəndlərindən gəlmiş ziyalılar, Tiflisdə gürcü ali məktəbində təhsil alan tələbələr, QHT nümayəndələri və jurnalistlər iştirak ediblər.

Tədbirin sonunda Amerika prezidenti Barak Obamaya, ABŞ konqresinə və Azərbaycan hökumətinə müraciət qəbul edilib.