Diaspor

Ana səhifə

Diaspor

Bişkekdə “Orta Asiyada Barış İçində Birgə Yaşama Kültürü” adlı beynəlxalq forum keçirilir - FOTOSESSİYA

Bişkekdə “Orta Asiyada Barış İçində Birgə Yaşama Kültürü” adlı beynəlxalq forum keçirilir - <font color=red>FOTOSESSİYA</font>

29 mart 2010 12:37 (UTC +04:00)

APA-nın məlumatına görə, “Dialoq Avrasya” Platformasının (DA) təşəbbüsü ilə gerçəkləşən forum Qırğızıstan Hökuməti Mədəniyyət Agentliyi, Beynəlxalq “Dialoq Avrasya” Platforması, Qırğızıstan “Dialoq Avrasya” Vəqfi tərəfindən təşkil olunub.

Tədbir başlamazdan öncə Qırğızıstan prezidenti Kurmanbek Bakiyev forum iştirakçılarını qəbul edib. Prezidentə “Dialoq Avrasya” Platformasının təsis etdiyi Çingiz Aytmatov ordeni təqdim edilib.

Forumun açılışında çıxım edən “Dialoq Avrasya” Platformasının hazırkı sədri Nurlan Orazalin platformanın fəaliyyətindən, keçirilən tədbirlərdən danışıb. O bildirib ki, platforma bölgə xalqlarının dostluq və sülh şəraitində yaşaması üçün səylərini davam etdirir.

Daha sonra Qırğızıstan Prezident Aparatının rəhbəri Kanıberk Coroyev Qırğızıstan prezidenti Kurmanbek Bakiyev adından forum iştirakçılarını salamlayıb, onun foruma məktubunu oxuyub. Məktubda DA-nın Avrasiyadakı ziyalıları, elm və mədəniyyət xadimlərini birləşdirən bir platforma olması, qloballaşma, bölgədə sülh və sabitliyin, anlaşmanın təmin olunması yönündəki fəaliyyəti təqdir olunub. Həmçinin böyük qırğız yazıçısı Çingiz Aytmatovun DA ilə bağlı fəaliyyəti xatırladılıb.

Forumda Azərbaycan nümayəndə heyəti adından Milli Məclisin Mədəniyyət komitəsinin sədri, millət vəkili Nizami Cəfərov çıxış edib. Bişkekdə DA-nın çox geniş ənənələri olduğunu deyən millət vəkili Qafqazdakı münaqişələrin bir müddət səngiməsində Bişkekdə olan bir toplantının rol oynadığını xatırladıb.

N. Cəfərov DA Platformasının Azərbaycan bürosunun fəaliyyətindən danışıb, platformanın iki müddət başqanı seçilmiş yazıçı Anarın DA ilə bağlı fəaliyyətindən söz açıb.

N. Cəfərov Azərbaycanla Qırğızıstan arasında münasibətlərin dərinləşməsini önəmini vurğulayıb: “Biz bu platforma çərçivəsində birlikdə daha çox iş görə bilərik”.

Daha sonra Qırğızıstan parlamentinin deputatı Zaydeddin Kurbanov, Türkiyə millət vəkili İrfan Gündüz, DA-nın həmsədri Harun Tokak, Qırğızıstan Ruhaniyyət Vəqfinin sədr müavini Sardalı Subanaqiyev çıxış ediblər. Çıxışçılar DA-nın anlaşma və sabitlik yaranması, Avrasiya ziyalılarının birgə müzakirələr aparmasındakı rolundan danışıblar.

Daha sonra forum işini panellərdə davam etdirib. “Orta Asiya-Dialoq və Mədəniyyətlərin beşiyi” adlı paneldə Tacikistan prezidentinin müşaviri Nodir Odilov “Orta Asiya xalqlarının sülh içində yaşamalarının tarixi təməlləri” mövzusunda çıxış edib.

Qeyd edək ki, forumun məqsədi Orta Asiya regionunda ölkələr arasında sərhəd, gömrük və digər sahələrə dair qanunvericiliyin təkmilləşdirilməsi ilə əlaqədar birgə fəaliyyət imkanlarını araşdırmaq, Orta Asiya respublikaları arasında siyasi, iqtisadi və mədəni əməkdaşlığı genişləndirmək perspektivlərini müzakirə etmək, ölkələrin ərazi bütövlüyünün təmin olunması, millətlər arasında əlaqələri və dostluğu möhkəmləndirəcək mədəni əməkdaşlığın yollarını axtarmaq, təhsil sahəsində əməkdaşlığı genişləndirmək, terror təşkilatlarının, separatçı qruplaşmaların fəaliyyətinə qarşı birgə mübarizə aparmaq imkanlarının təhlili, media qurumları arasında əməkdaşlıq perspektivlərini dəyərləndirməkdir.

Foruma Azərbaycandan da nümayəndə heyəti qatılıb. Heyətin tərkibinə Azərbaycan Yazıçılar Birliyinin sədri Anar, millət vəkili Nizami Cəfərov, APA İnformasiya Agentliyinin direktoru Vüsalə Mahirqızı, İTV xəbərlər və analitik proqramlar departamentinin rəhbəri Anar Yusifoğlu, “Xəzər” TV-nin icraçı direktoru Hüseyn Dinləməz, jurnalist Qulu Məhərrəmli, Qafqaz Universitetinin müəllimi Fərhad Mehdiyev, “Dialoq-Avrasya” Platformasının Azərbaycan nümayəndəliyinin koordinatoru Mustafa Saatçı və platformanın gənclər təşkilatının rəhbəri Anar Qaraxançallı daxildir.

Qeyd edək ki, Azərbaycan heyəti dünən Bişkekdə böyük qırğız yazıçısı Çingiz Aytmatovun məzarını ziyarət edərək, repressiya qurbanlarına həsr olunmuş muzeyə baxıb. Heyət Çingiz Aytmatov adına türk liseyi, DA-nın Qırğızıstan ofisi ilə də tanış olub.