Diaspor

Ana səhifə

Diaspor

31 Mart - Azərbaycanlıların Soyqırımı gününə həsr olunmuş “Soyqırım” filminin təqdimatı olub - YENİLƏNİB - FOTOSESSİYA

31 Mart - Azərbaycanlıların Soyqırımı gününə həsr olunmuş “Soyqırım” filminin təqdimatı olub - <font color=red>YENİLƏNİB - FOTOSESSİYA</font>

30 mart 2010 09:43 (UTC +04:00)

APA-nın məlumatına görə, film “Avrasiya Beynəlxalq Araşdırmalar İnstitutu” İctimai Birliyi tərəfindən hazırlanıb. Filmdə 1918-ci il martın 31-də Qubada ermənilərin törətdiyi soyqırım zamanı valideynlərini, doğmaların itirmiş, həmin hadisənin şahidi olan insanların taleyindən bəhs olunur. Filmin ssenari müəllifi və rejissoru Etibar Məmmədov, redaktoru Kəmalə Paşayeva, elmi rəyçisi, tarix elmləri doktoru, professor Musa Qasımlı, baş məsləhətçisi isə millət vəkili Qənirə Paşayevadır. Film Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə hazırlanıb.

“Avrasiya Beynəlxalq Araşdırmalar İnstitutu” İctimai Birliyinin sədri Günel Paşayeva tədbirdə çıxış edərək ermənilərin Azərbaycanın müxtəlif bölgələrində həyata keçirdikləri soyqırımlar haqqında məlumat verib. Onun sözlərinə görə, 1918-20-ci illərdə ermənilərin törətdikləri soyqırımlar zamanı ümumilikdə 700 minə yaxın azərbaycanlı vəhşicəsinə qətlə yetirilib. G. Paşayeva bildirib ki, hazırlanmış film Azərbaycan telekanallarında nümayiş ediləcək, filmin ingilis dilli variantı hazırlanaraq aprel ayında ABŞ-da və Avropanın bir sıra şəhərlərində təqdimatları keçiriləcək. Bundan başqa, film minlərlə nüsxədə çoxaldılaraq Xarici İşlər Nazirliliyinə, Diasporla İş üzrə Dövlət Komitəsinə və digər qurumlara təqdim olunacaq. G. Paşayeva bildirib ki, filmin çəkilişləri Quba rayonunda aparılıb və soyqırım zamanı yaxınlarını itirmiş şəxslər, bu hadisələrin şahidləri filmdə yer alıblar. Qubada azərbaycanlılarla yanaşı, soyqırıma məruz qalan digər millətlərin nümayəndələrinin fikirləri də filmdə əksini tapıb.

Sonra film nümayiş etdirilib.

Filmin nümayişindən sonra çıxış edən Prezident yanında QHT-lərə Dövlət Dəstəyi Şurasının sədri Azay Quliyev filmin təsirli olduğunu deyib, faktların canlı şahidlərin dilindən səsləndirilməsinin önəmini qeyd edib.

Tarix İnstitutunun direktoru Yaqub Mahmudov isə bildirib ki, belə filmlərin çəkilməsinə böyük ehtiyac var. Y. Mahmudov bəzi QHT-ləri ABŞ-a, başqa-başqa ölkələrə işləməyi dayandırıb, vətənə xidmət etməyə çağırıb.

Millət vəkili Qənirə Paşayeva filmdə hadisələrin şahidlərin dilindən səsləndirilməsinin böyük təsirinin olduğunu qeyd edib. Bu mövzuda çəkilən filmlərin xaricə çıxarılmasının vacibliyini vurğulayan millət vəkilinin sözlərinə görə, buna böyük ehtiyac var: “Bu filmlər vasitəsi ilə biz beynəlxalq ictimaiyyətdə sadə insanlara öz sözümüzü deməliyik. Onsuz da siyasətçilərin özləri üçün formalaşmış fikirləri var, biz həmin beynəlxalq siyasətçilərin seçicilərinə bu faktları çatdırmağı düşünürük”. Q. Paşayeva bu istiqamətdə istənilən QHT-yə, bu təşəbbüsü irəli sürən istənilən şəxsə yardım etməyə hazır olduğunu qeyd edib: “Biz sürətlə işləsək, həqiqətləri dünya ictimaiyyətinin diqqətinə çatdıra bilərik”.

Quba rayonundan seçilmiş millət vəkilləri, filmin rejissoru və digər şəxslər də çıxış edərək film barədə fikirlərini bildiriblər.

Qeyd edək ki, təqdimat mərasiminə millət vəkilləri, tarixçilər, tələbələr, kino ictimaiyyətinin nümayəndələri də qatılıb.

“Soyqırım”_film