Diaspor

Ana səhifə

Diaspor

Gürcüstan Azərbaycanlıları Konqresinin nəzdində fəaliyyət göstərən Gənclər Təşkilatının üzvləri 31 mart Azərbaycanlıların Soyqırımı anım gününü qeyd ediblər

31 mart 2010 23:28 (UTC +04:00)

Tiflis. Nizami Məmmədzadə-APA. Gürcüstan Azərbaycanlıları Konqresinin nəzdində fəaliyyət göstərən Gənclər Təşkilatının təşəbbüsü ilə 31 mart Azərbaycanlıların Soyqırımının anım tədbiri keçirilib. Bu barədə APA-nın Gürcüstan bürosuna Konqresin sədri Əli Babayev məlumat verib.

Soyqırımın anımı gününə Qardabanidən, Bolnisdən, Marneulidən, Sadaxlıdan gəlmiş gənclər qatılıblar. Tədbirdə iştirak edən gürcü ictimaiyyətinin nümayəndələri, gürcü və azərbaycanlı ziyalıları öz çıxışlarında qeyd ediblər ki, son dövrlər erməni lobbisi keçmişin əsassız hadisələrini XXI əsrdə şişirtməklə, təkrarən gündəmə gətirməklə dünya ictimaiyyətinə yalan və uydurulmuş informasiyalar ötürür. Tədbirdə çıxış edən gürcü akademiki Mixail Kurdiani və Qafqaz üzrə ekspert Mamuka Araşidze bildiriblər ki, keçən əsrin 18-ci ilində ermənilər tərəfindən törədilən bu Soyqırımı barədə faktları gürcü cəmiyyətinə tanıtmaq və göstərmək üçün foto şəkillərdən və hadisələri özündə əks etdirən sənədli yazılardan ibarət kitab nəşr etmək lazımdır.

Ə.Babayev kitabın gələn il Soyqırımın anım gününədək nəşr edəcəklərini bildirib: «Biz bu kitabı Konqresin xətti ilə gələn ilə yazıb başa çatdıracağıq. Buraya eyni zamanda Sadaxlıda azərbaycanlıların başına gətirilən oyunları, faciələri və problemləri də daxil edəcək, Abxaziyada Baqramyan adına erməni batalyonunun gürcülərə qarşı törətdiyi Soyqırımından da faktlar göstərəcəyik».

Tədbirdə Gənclər təşkilatının sədri Zemfira İsmayılova, onun müavini Rasim İsmayılov və gürcü ali məktəbində təhsil alan bir neçə tələbələr çıxış ediblər. Tədbir iştirakçılarına erməni terroru və Azərbaycanlıların Soyqırımından bəhs edən film nümayiş etdirilib.

Tədbirin sonunda Dünya ictimaiyyətinə ermənilərin törətdiyi vəhşiliklərə hüquqi və siyasi qiymət vermək üçün Müraciət qəbul edilib.