Diaspor

Ana səhifə

Diaspor

Rustavidə gənc azərbaycanlı şair və yazıçılarının poeziya gecəsi keçirilib

14 aprel 2010 19:58 (UTC +04:00)

Rustavi. Nizami Məmmədzadə-APA. Bu gün Rustavi şəhərindəki “Tamada” restoranında gənc azərbaycanlı şair və yazıçılarının poeziya gecəsi keçirilib.

APA-nın Gürcüstan bürosunun məlumatına görə, gecəni Gürcüstan reinteqrasiya məsələləri üzrə dövlət nazirinin müavini Yelena Tevdoradze açaraq, öz arzularını və təkliflərini azərbaycanlı gənclərə bildirib və onlara uğurlar arzulayıb. Tədbirdə gürcü şairi Rati Amağlebeli, gənc şairlərdən Azad Əbdürrəhmanov, Samirə Bayramova, Ramilə Babakişiyeva, Elina Cəlilova, Salome Sulaberidze və başqaları ilk qələm təcrübələrini oxuyublar. Gürcü şairi Paata Şamuqiya gənc şairlərin çıxışlarını bəyəndiyini bildirib və belə tədbirləri tez-tez keçirməyi arzulayıb. Kvemo-Kartli qubernatorunun müavini Hüseyn Yusifov poeziya gecəsində çıxış edərək tədbir üçün reinteqrasiya nazirliyinə təşəkkürünü bildirib.

Tədbirdə Gürcüstan parlamentinin deputatı David Nadaşvili, Rustavi Mədəniyyət Mərkəzinin rəhbəri Xaləddin Yolçuyev, reinteqrasiya nazirliyinin müşaviri Savalan Mirzəyev, jurnalistlər və məktəb direktorları, QHT nümayəndələri, Marneuli Mədəniyyət Mərkəzinin əməkdaşları iştirak ediblər. Poeziya gecəsində qərara alınıb ki, gələcəkdə gənc şairlərin şeir və nəsr əsərləri gürcü və Azərbaycan dillərində kitab şəkilində nəşr edilsin.

Gürcüstan reinteqrasiya məsələləri üzrə dövlət nazirinin müavini Yelena Tevdoradze APA-ya açıqlamasında bildirib ki, bu tədbir hələ başlanğıcdır. «Sonralar belə tədbirlər geniş formada olacaq. Azərbaycanlılar təkcə Kvemo-Kartlidə deyil, Gürcüstanın digər bölgələrində yaşayırlar. Biz burada yazıb-yaradan şairləri də dəvət edəcəyik. Başqa bölgələrdə yaşayan digər etnik nümayəndələr də var. Bizim ölkədə ləzgilər, məhsəti türkləri, ermənilər, çeçenlər yaşayırlar. Biz gənc şairlərin klubunu yaratmaq istəyirik. Onlar sistemli şəkildə gürcü şairləri və yazıçıları ilə burada görüşəcəklər. Bir neçə ildən sonra daha çox gənclər bu kluba daxil olacaq. Mən istəyirəm ki, gürcülər Azərbaycan dilində şerin deyiliş gözəlliyini, azərbaycanlılar isə gürcü dilində şeirin necə səsləndiyinin şahidi olsunlar. Bu iki millətin bir-birinə daha da yaxınlaşmasına kömək edəcək. Burada iştirak edən gürcü şairləri çox təəssüf edirlər ki, Azərbaycan dilini bilmirlər. Biz bir-birimizlə çox danışıb, görüşsək o qədər də biz varlı olarıq. Gürcüstanın gözəlliyi və varlığı ondadır ki, bu ölkə çoxmillətlidir».