Diaspor

Ana səhifə

Diaspor

Beynəlxalq Diaspor Mərkəzinin rəhbəri Gürcüstanda yaşayan azərbaycanlı və gürcü ziyalılarını Quba məzarlığına baxmağa dəvət edib

14 aprel 2010 21:32 (UTC +04:00)

Marneuli. Nizami Məmmədzadə-APA. «Biz Gürcüstanda yaşayan soydaşlarımızı, o cümlədən gürcü ziyalıları Quba məzarlığını ziyarət etməyə, baxmağa dəvət edirik». APA-nın Gürcüstan bürosunun məlumatına görə, bunu Beynəlxalq Diaspora Mərkəzinin (BDM) rəhbəri İsmayıl Ağayev Marneulidə səfərdə olarkən deyib.

«BDM son 2 ildə 37 dəfə Quba məzarlığına səfər edib. Biz 25 dəfə Azərbaycana yaxın xarici vətəndaşların və xaricdə fəaliyyət göstərən təşkilat nümayəndələrinin iştirakı ilə Quba məzarlığında olmuşuq. Mən Quba məzarlığında dəfn edilmiş adamların bəzilərinin nəvələrini İsrailə aparmışam. Onlar İsrail parlamentində qətl ilə bağlı fikirlərini söyləyiblər. BDM bu yaxınlarda Avropa ali məktəblərinin müəllimlərini Quba məzarlığına gətirib. Bu gün Marneulidə olduğumdan istifadə edərək Azərbaycanlıların Mədəniyyət Mərkəzinin nümayəndələrini Quba məzarlığına baxmağa dəvət edirəm. Orada tək azərbaycanlıların yox, həm də gürcü ziyalıları, alimləri və ali təhsil sahəsində çalışan gürcü pedaqoqlarının olması çox vacibdir. İstəyimiz odur ki, onlar erməni məkrini, erməni vəhşiliyinin nəticələrini öz gözləri ilə Quba məzarlığında görsünlər. Səfərdən qayıdanda isə öz övladlarına, qonşularına, ali tədris ocaqlarında dərs dedikləri tələbələrə və müəllim heyətinə ermənilərin vəhşiliyini çatdırsınlar. Bu gün erməni icması Gürcüstan parlamentində «erməni soyqırımı»nın tanınması ilə bağlı məsələ qaldırıb. Qoy gürcü ziyalıları, soydaşlarımız soyqırımın nə olduğunu gəlib Quba məzarlığında görsünlər və soyqırım nə olduğunu bilsinlər», deyə İ.Ağayev bildirib.