Diaspor

Ana səhifə

Diaspor

Marneulidə Nəriman Nərimanovun 140 illiyi münasibəti ilə tədbir keçirilib - FOTOSESSİYA

Marneulidə Nəriman Nərimanovun 140 illiyi münasibəti ilə tədbir keçirilib - <font color=red>FOTOSESSİYA</font>

14 aprel 2010 22:16 (UTC +04:00)

Marneuli. Nizami Məmmədzadə-APA. Aprelin 14-də Marneulidə görkəmli yazıçı-dramaturq, tərcüməçi, pedaqoq və ictimai xadim Nəriman Nərimanovun 140 illik yubileyi qeyd olunub.

APA-nın Gürcüstan bürosunun məlumatına görə, yubileydə Bakıdan gəlmiş Beynəlxalq Diaspor Mərkəzinin (BDM) rəsmiləri və Marneuli ziyalıları, dövlət adamları iştirak ediblər. Tədbir iştirakçıları Nəriman Nərimanovun Marneulidə ucaldılmış büstü önünə əklil və gül-çiçək dəstələri qoyublar. Professor Vaqif Arzumanlı N. Nərimanovun büstü önünə toplanmış şagird və müəllim kollektivlərinin qarşısında çıxış edərək Nəriman Nərimanovun Gürcüstan və Azərbaycanla bağlı tarixi xidmətlərindən söhbət açıb. Sonra tədbir Azərbaycanlıların Mədəniyyət Mərkəzində davam etdirilib. Tədbirdə Mərkəzin rəhbəri Fazil Həsənəv, tarixçi müəllim, Gürcüstan tarixçilər cəmiyyətinin üzvü Nərgiz Nəbiyeva, BDM-nın rəhbəri İsmayıl Ağayev, professor Vaqif Arzumanlı, Gürcüstan parlamentinin deputatı Azər Süleymanov, BDM-nın Avropa təmsilçisi, Çex Universitetinin professoru Azər Kərimov, Azərbaycanın Gürcüstandakı səfirliyinin əməkdaşı Fəxri Hacıyev və başqaları çıxış edərək böyük şəxsiyyət və ictimai xadim Nəriman Nərimanovun həyatı barədə tarixin maraqlı və yaddaqalan səhifələrindən, onun Azərbaycan xalqının tarixində möhtəşəm rol oynamağından və N.Nərimanovun fəaliyyət göstərdiyi Tiflis, Borçalı mühitindən söhbət açıblar.

Tədbirin sonunda Beynəlxalq Diaspora Mərkəzi ilə Azərbaycanlıların Mədəniyyət Mərkəzi arasında əməkdaşlıq barədə Memorandum imzalanıb. Tədbir iştirakçıları qərara alıblar ki, professor Vaqif Arzumanlının və Mədəniyyət Mərkəzinin iştirakı ilə N. Nərimanov haqqında Azərbaycan və gürcü dillərində buklet hazırlansın.

Filologiya elmləri doktoru, professor Vaqif Arzumanlı APA-ya açıqlamasında bildirib ki, Nərimanov haqqında oxuduqca, onun siyasi fəaliyyətini diqqətlə öyrəndikcə, müstəqil Azərbaycanın tarixinin yeni səhifələrini öyrənmək mümkündür. «Burada bu günkü gəncliyin Nərimanova olan məhəbbətini, rəğbətini hiss edirəm. Nərimanovun fəaliyyəti o qədər böyükdür ki, ona təkcə yubiley günlərində yox, həmişə böyük diqqət ayırmaq lazımdır. Onun haqqında bilən də danışır, bilməyən də. Bu düzgün deyil. Nərimanov haqqında hər bir azərbaycanlı, hər bir ziyalı, lap gürcü olsun, rus tədqiqatçısı olsun, onun haqqında danışanda tarixi faktlara əsaslanmalıdır. Onun fəaliyyətinə ləkə gətirəcək bir tarixi səhv görmürəm. Nərimanov kimi şəxsiyyətləri zaman və məkan çərçivəsində araşdırmaq, onun fəaliyyətini zaman və məkan bucağı altında qiymətləndirmək lazımdır. Onda biz onun nəhəngliyini daha aydın görərik. Baxmayaraq ki, XI Qızıl Ordu Azərbaycanı işğal elədikdə Nərimanova demişdilər ki, bir hökumət digər hökumət ilə əvəz olunacaq. Nərimanov bu ordunun Azərbaycanı işğal etməsinə inanmırdı. O, bilsəydi ki, XI Qızıl Ordu Azərbaycanı işğal edəcək, ölümünə razı olardı, amma buna getməzdi.
Nərimanov Moskvaya getdikdən sonra Azərbaycan torpaqları yavaş-yavaş zəbt olunmağa başladı. Nərimanov Bakıda qalsaydı, Azərbaycan öz torpaqlarını itirməzdi».

«Borçalı elinin ağsaqqalları, parlament deputatları, Azərbaycan səfirliyinin nümayəndələri, Mədəniyyət Mərkəzinin nümayəndələri bizi, təşkilatımızın nümayəndələrini səmimi hisslərlə qarşıladılar. Mən burada Nərimanovun abidəsi önünə minlərlə şagirdlərin toplaşdığını gördüm. Bu böyük şəxsiyyətə hörmət gördüm. Burada məhəbbət gördüm, camaatın gözündə sevinc gördüm. Mən burada nərimansevərləri gördüm. Burada insanlar ulu öndərə nə qədər hörmət edirlərsə, Nərimanova da belə hörmət edirlər». Bu sözlər isə BDM-nın sədri İsmayıl Ağayevə məxsusdur.