Diaspor

Ana səhifə

Diaspor

Azərbaycan nümayəndə heyəti sabah İsrailə yola düşür

03 may 2010 13:27 (UTC +04:00)

Bakı. Kəmalə Quliyeva – APA. Azərbaycan Diasporla İş üzrə Dövlət Komitəsi və Azərbaycan-İsrail Beynəlxalq Assosiasiyasının təşkilatçılığı ilə Tel-Əviv şəhərində «Ön Asiya: kütləvi informasiya vasitələri və regional münaqişələr» mövzusunda beynəlxalq konfrans keçiriləcək. Diasporla İş üzrə Dövlət Komitəsinin mətbuat xidmətindən APA-ya verilən məlumata görə, komitə sədri Nazim İbrahimovun rəhbərliyi ilə Azərbaycan nümayəndə heyəti tədbirdə iştirak etmək üçün mayın 4-də İsrailə yola düşəcək. Nümayəndə heyətinə millət vəkili Yevda Abramov, “Dağ yəhudiləri” icmasının rəhbəri Semyon İxiilov, “Aşkenazi yəhudiləri” icmasının rəhbəri Gennadi Zelmanoviç, Avrasiya Yəhudiləri Konqresinin vitse-prezidenti Matvey Yelizarov, Bakı Yəhudi Evinin icraçı direktoru Şaul Davidov, Azərbaycan Prezidenti yanında Dövlət İdarəçilik Akademiyasının müəllimi, tarix elmlər doktoru Elman Nəsirov, politoloq Tofiq Abbasov, Azərbaycan Jurnalistlər Birliyinin sədri, “Zerkalo” qəzetinin baş redaktoru Elçin Şıxlı, APA-nın baş direktoru Vüsalə Mahirqızı, “Day.az” portalının və “Trend” informasiya agentliyinin baş direktoru İlqar Hüseynov, “1st news” informasiya agentliyinin baş direktoru Rəhman Hacıyev, digər KİV təmsilçiləri, xanəndələr Nəzakət Teymurova, Teyyub Aslanov, kamança ifaçısı Elşən Mansurov, tarzən Əliağa Sədiyev, müğənnilər Ədalət Şükürov, Lalə Məmmədova, Xəyyam Nisanov və digərləri daxildir.

Tədbirin məqsədi dövlət rəsmlərinin, regiondakı prosesləri dərindən bilən politoloqların və mütəxəssislərin, habelə Azərbaycan, İsrail, ABŞ, Rusiyada fəaliyyət göstərən rusdilli kütləvi informasiya vasitələri rəhbərlərinin iştirakı ilə medianın münaqişələrin həllində roluna dair müzakirələr aparmaqdır. Konfransda Dağlıq Qarabağ münaqişəsi, Yaxın Şərqdəki vəziyyət və digər münaqişələr müzakirə ediləcək, Azərbaycan və İsrail KİV-ləri arasında əməkdaşlığın müasir durumu və inkişaf perspektivləri, Azərbaycan və İsrail dövlətləri arasında münasibətlərin regionda sülhün və təhlükəsizliyin təmin olunmasında rolu, Azərbaycanda dini və etnik tolerantlıq Azərbaycan və yəhudi xalqları arasında dostluq və tərəfdaşlığın inkişafının mühüm amili kimi və digər mövzularda məruzələr səslənəcək.

Mayın 7-dək davam edəcək səfər çərçivəsində Azərbaycan nümayəndə heyəti Hadera şəhərində Heydər Əliyevin adını daşıyan xiyabanın açılışında da iştirak edəcək.

Qeyd edək ki, İsraildə fəaliyyət göstərən Azərbaycan-İsrail Beynəlxalq Assosiasiyasının (Azİs) müraciəti əsasında Hadera şəhər bələdiyyəsi Heydər Əliyevin xatirəsinin əbədiləşdirilməsi haqqında qərar qəbul edib. Qərara əsasən, Hadera şəhərinin mərkəzində yerləşən Ahad ha-Am küçəsindəki xiyabanda Heydər Əliyevin xatirə lövhəsinin təməl daşı qoyulacaq və xiyaban onun adını daşıyacaq. 3800 kv.m ərazini əhatə edən xiyabanda əsaslı yenidənqurma və abadlaşdırma işləri də aparılacaq. Yenidənqurma və abadlaşdırma işlərini İsrail dövləti maliyyələşdirəcək.

Əlavə edək ki, Haderada əslən Azərbaycandan olan böyük icma yaşayır. Bu şəhər Tel-Əvivin yaxınlığında yerləşir, yaşıllıqla zəngin ərazidir, Heydər Əliyevin adına verilən xiyaban isə şəhərin mərkəzindədir.

İsrail