Diaspor

Ana səhifə

Diaspor

Gürcüstanın reinteqrasiya məsələləri üzrə dövlət nazirinin müavini Azərbaycandilli məktəb və QHT nümayəndələri ilə görüşüb

05 may 2010 21:19 (UTC +04:00)

Dmanisi. Nizami Məmmədzadə-APA. Gürcüstanın reinteqrasiya məsələləri üzrə dövlət nazirinin müavini Yelena Tevdoradze Dmanisidə Azərbaycandilli orta məktəb direktorları ilə görüşüb. APA-nın Gürcüstan bürosunun məlumatına görə, bu barədə xəbəri nazirliyin Kvemo-Kartli bölgəsi üzrə nümayəndəsi Savalan Mirzəyev bildirib. Onun xəbərinə görə, görüşdə 10 Azərbaycandilli orta məktəbin direktoru iştirak edib. Nazir müavini Yelena Tevdoradze məktəb direktorlarına bu il Gürcüstanda keçiriləcək gürcü ali məktəblərə qəbul imtahanların qaydaları və tələbləri, etnik azlıqlara verilən güzəştlər barədə ətraflı məlumat verib. Sonra Y. Tevdoradze məktəb direktorları ilə fikir mübadiləsi aparıb. Nazir müavini təhsilin inkişafında mövcud çatışmazlıqlar barədə Azərbaycandilli məktəb rəhbərlərinin təkliflərini dinləyib, çatışmazlıqların nəzərə alınacağını bildirib.

APA-nın məlumatına görə, Dmanisi bölgəsinə səfər edən nazir müavini Yelena Tevdoradze burada Kvemo-Kartli bölgəsində fəaliyyət göstərən QHT nümayəndələri ilə də görüşüb. Nazirliyin Kvemo-Kartli üzrə nümayəndəsi Savalan Mirzəyevin APA-ya bildirdiyi xəbərə görə, görüşdə Gürcüstan prezidentinin təşəbbüsü ilə irəli sürülmüş 5 illik proqram olan «Mülki inteqrasiya və tolerantlıq» layihəsinin necə yerinə yetirilməsi barədə müzakirələr aparılıb, Kvemo-Kartlidə bu layihənin monitorinqinin həyata keçirilməsinin vacibliyi vurğulanıb. «Artıq monitorinq başlayıb. Biz QHT nümayəndələrinə təklif etdik ki, onlar da QHT kimi bizə kömək etsinlər. Görüləsi işlərimiz çoxdur. 5 illik proqram uğurla həyata keçirilir. Bu proqramda etnik azlıqların sosial həyat tərzinin, onların yaşadığı ərazilərdə infrastrukturun yaxşılaşdırılması və digər vacib sosial layihələrin yerinə yetirilməsi məsələləri öz əksini tapıb. İrəliləyiş var. Buna görə də gündəmdə olan bu məsələlərin yerinə yetirilməsi prosesinə QHT-ləri də cəlb etmək istəyirik».