Diaspor

Ana səhifə

Diaspor

İsrailin Hadera şəhərində Heydər Əliyevin adını daşıyan xiyabanın açılışı olub

07 may 2010 01:41 (UTC +04:00)

Açılış mərasimində çıxış edən Hadera şəhərinin meri Xaim Avinat deyib ki, müstəqil Azərbaycanın qurucusu Heydər Əliyev dünya tarixində ədalətli və insanpərvər dövlət başçısı kimi yaddaşlarda yaşayır. Heydər Əliyev Azərbaycanda olan millətlər arasında heç bir fərq qoymayıb. Məhz bunun nəticəsidir ki, Azərbaycan dünyanın ən tolerant ölkəsi kimi tanınır: «Haderada bu parkın yerləşdiyi küçəyə Yəhudi dövlətinin əsasını qoymuş dahi insan Hertselin adı verilib. Bu küçədə yəhudi xalqının yaxın dostu və lideri Heydər Əliyevin adını daşıyan parkın açılması bizim ürəyimizcədir. Biz dünya miqyaslı bir siyasi xadimin - Heydər Əliyevin adının Haderada əbədiləşdirilməsindən qürur duyuruq».

Onun sözlərinə görə, məhz həmin küçədə Heydər Əliyev parkının yanında musiqi məktəbi açılacaq, kompleks yaradılacaq: «Bu həm də Azərbaycanla Hadera arasında dostluq körpüsünün təməlidir».

Daha sonra mer, ulu öndər Heydər Əlieyev siyasi kursunu layiqincə davam etdirdiyinə görə Azərbaycan Prezidenti İlham Əliyevə minnətdarlıq edib, dostluq əlaqələrimizin bundan sonra da inkişaf edəcəyini bildirib.

Sonra çıxış edən Azərbaycan Respublikası Diasporla İş üzrə Dövlət Komitəsinin sədri Nazim İbrahimov ilk növbədə, ulu öndər Heydər Əliyevin xatirəsinin əbədiləşdirilməsi ilə bağlı qərara görə Azərbaycan hökuməti adından xarici işlər naziri Aviqdor Libermana, Hadera şəhərinin meri Xaim Avinata və bütün şəhər ictimaiyyətinə minnətdarlığını ifadə edib və xiyabanın açılışının xalqlarımız arasındakı dostluq əlaqələrinin daha da möhkəmlənməsinə, həyatımızın bütün sahələrindəki əməkdaşlığın genişlənməsinə xidmət edəcəyinə əmin olduğunu bildirib.

O deyib ki, ulu öndər Heydər Əliyev ölkəmizdə tolerantlığın möhkəmlənməsində müstəsna xidmətlər göstərib: «Heydər Əliyevin diqqət və qayğısı sayəsində respublikada qədim ənənələrə malik olan yəhudi icmasının mədəni irsi dövlət tərəfindən daim qorunub. Məhz bu diqqət və qayğının təzahürü olaraq, Bakı Dövlət Universitetinin Şərqşünaslıq fakültəsində ibrani bölməsi açılıb, Azərbaycan Milli Elmlər Akademiyasının Etnoqrafiya İnstitutu isə Rusiyanın “Yəhudi mədəniyyətinin qorunması və inkişafı fondu” ilə birgə “Yəhudilər Azərbaycanda” kitabını hazırlayıb».

DİDK sədri onu da qeyd edib ki, bu gün respublikada 7 yəhudi dini icması qeydiyyatdan keçib: «Bakıda nəzəriyyəçi-fizik, Nobel mükafatı laureatı Lev Landau, respublikanın əməkdar həkimi Solomon Qusman, müharibə qəhrəmanı Albert Aqarunov və digər tanınmış yəhudi şəxsiyyətlərinin yaşadıqları binalarda xatirə lövhələri qorunub saxlanılır. Milli lider Heydər Əliyevin təşəbbüsü ilə 1996-cı ildən sonra dövlət daha iki sinaqoqu yəhudilərə qaytarıb. İndi Bakıda 3, Oğuz və Qubada isə 1 yəhudi sinaqoqu mövcuddur, 2003-cü ildə Bakı şəhərində açılmış sinaqoq hazırda Avropada yerləşən ən böyük sinaqoqdur. Nazim İbrahimov deyib ki, Azərbaycanda yəhudi mədəniyyət mərkəzləri, dini icmalar, məktəblər fəaliyyət göstərir. 2003-cü ilin sentyabrında Bakıda ilk ümumtəhsil yəhudi məktəbi açılıb».

“Milli lider Heydər Əliyev yəhudi icmasının Azərbaycanın iqtisadi və sosial-mədəni inkişafındakı rolunu həmişə çox yüksək qiymətləndirib” deyən Komitə sədrinin sözlərinə görə, Hadera şəhərinin mərkəzində Azərbaycan xalqının ümummilli liderinin adını daşıyan xiyabanın təməlqoyma mərasiminin keçirilməsi Yəhudi xalqının böyük dövlət xadimi Heydər Əliyevin xatirəsinə dərin ehtiramının və Azərbaycana olan sevgisinin parlaq təzahürlərindən biridir: «Bu gün Azərbaycan Respublikasının Prezidenti İlham Əliyev əsasını ulu öndər Heydər Əliyevin qoyduğu tarixi ənənələri uğurla davam etdirməkdədir. Azərbaycan Prezidenti ölkəmizdə tolerantlığın qorunub saxlanılması, qarşılıqlı etimada dayanan vətəndaş həmrəyliyinin möhkəmləndirilməsinə istiqamətlənmiş siyasət yürüdür. Əminəm ki, bizim birgə, qarşılıqlı fəaliyyətimiz Azərbaycan və İsrail xalqları arasındakı əlaqələrin daha da möhkəmlənməsinə xidmət edəcək».

İsrail Knessetinin deputatı xanım Faina Kirşenbaum isə çıxışında deyib ki, beynəlxalq aləmdə siyasi proseslərin gərgin olduğu bir vaxtda Azərbaycan-İsrail əlaqələrinin yaxınlaşması hamıya yaxşı nümunə olmalıdır: «Bu gün Hadera şəhərində İsrail xalqının yaxın dostu, öz ədalətliliyi, prinsipiallığı və insanpərvərliyi ilə seçilmiş Heydər Əliyevin adının əbədiləşdirilməsi bizi daha da yaxınlaşdırır, dostluğumuzu daha da möhkəmləndirir. Biz Heydər Əliyev kimi tarixi şəxsiyyətin adının əbədiləşdirilməsindən qürur duyuruq».

Sonra xatirə lövhəsinin təməlqoyma mərasimi olub.

Xatırladaq ki, İsraildə fəaliyyət göstərən Azərbaycan-İsrail Beynəlxalq Assosiasiyasının (Azİs) müraciəti əsasında Hadera şəhər bələdiyyəsi Azərbaycan xalqının milli lideri Heydər Əliyevin xatirəsinin əbədiləşdirilməsi haqqında qərar qəbul edib. Məhz bu qərara əsasən, Hadera şəhərinin mərkəzində yerləşən xiyabanda ulu öndər Heydər Əliyevin xatirə lövhəsinin təməl daşı qoyulub və xiyaban Azərbaycanın milli liderinin adını daşıyacaq. Xiyabanda əsaslı yenidənqurma və abadlaşdırma işləri də aparılacaq.

Qeyd edək ki, Haderada əslən Azərbaycandan olan böyük icma yaşayır. Bu şəhər Tel-Əvivin yaxınlığında yerləşir, yaşıllıqla zəngin ərazidir, ulu öndər Heydər Əliyevin adına verilən xiyaban isə şəhərin mərkəzindədir. Xiyabanın açılışında Milli Məclisin üzvü Yevda Abramov, İsrailin 7 şəhərinin vitse-meri, Azərbaycandakı KİV orqanlarının, yəhudi icmalarının rəhbərləri, bir neçə ölkənin İsraildə akkreditə olunmuş səfirliklərinin əməkdaşları və şəhər ictimaiyyətinin nümayəndələri, eləcə də digər şəhərlərdə yaşayan Azərbaycan əsilli yəhudilər iştirak ediblər.

Tədbir Azərbaycan və İsrail incəsənət ustalarının ifasında konsert proqramı ilə başa çatıb.