Diaspor

Ana səhifə

Diaspor

Bakıda “Azərbaycanın rus gəncliyi: respublikanın ictimai-siyasi, iqtisadi və mədəni həyatına inteqrasiya” mövzusunda konfrans keçirilir

15 may 2010 11:50 (UTC +04:00)

Bakı. Viktoriya Dementyeva – APA. Bakıda Azərbaycan Rus Gəncliyi Assosiasiyasının təşkilatçılığı ilə “Azərbaycan rus gəncliyi: respublikanın ictimai-siyasi, iqtisadi və mədəni həyatına inteqrasiya” mövzusunda konfrans keçirilir.
APA-nın məlumatına görə, tədbirə Azərbaycanın rus icması və Gənclər və İdman Nazirliyi (GİN) dəstək verir. Konfransda rus gəncliyinin ölkənin ictimai həyatında iştirakı və Azərbaycan cəmiyyətinə inteqrasiyası məsələləri müzakirə olunur.
Konfransın açılışında Azərbaycan Prezident Administrasiyası ictimai-siyasi şöbəsinin müdiri Əli Həsənov, gənclər və idman naziri Azad Rəhimov və Rusiyanın Azərbaycandakı səfiri Vladimir Doroxin də iştirak ediblər.
Ə. Həsənov çıxışında rus gəncliyinin Azərbaycanın həyatında vacib rol oynadığını deyib: “Azərbaycanda gəncliyə münasibətdə milli mənsubiyyətə və dilinə görə heç vaxt ayrı-seçkiliyə yol verilməyib. Biz ölkədən kənarda müxtəlif idman və musiqi yarışlarında Azərbaycan bayrağını yüksəklərə qaldıran rus gəncləri ilə fəxr edirik, onları nümunə göstəririk”.
Şöbə müdiri gənclər siyasətinin ölkənin yürütdüyü ümumi siyasətin prioritetlərindən biri olduğunu da vurğulayıb.
Ə. Həsənov rus gəncliyinin Azərbaycan dilini aktiv öyrənməsini arzu edib, bunun inteqrasiya üçün mühüm amil olduğunu söyləyib.
Səfir V. Doroxin bildirib ki, Azərbaycanda rus gəncliyi üçün hər cür şərait yaradılıb: “Bu isə ölkələrimizi daha da yaxınlaşdırır, münasibətləri daha möhkəmləndirir. Biz çox sevinirik ki, rus gəncliyi Azərbaycan cəmiyyətinin mühüm bir parçasına çevrilib. Heç bir diskriminasiya yoxdur, əksinə yaşamaq üçün hər cür şərait yaradılıb. Bu isə ölkələrimizi daha da yaxınlaşdırır, münasibətlərə hərarət gətirir”.
Qeyd edək ki, konfransa Azərbaycan Rus Gəncliyi Assosiasiyasının Bakı və regionlardan olan 380-dək üzvü, GİN, Təhsil Nazirliyindən nümayəndələr, Milli Məclisin deputatları, Rusiyanın Azərbaycandakı səfirliyinin əməkdaşları, həmçinin Rusiya gənclər təşkilatlarının təmsilçiləri qatılıblar.