Diaspor

Ana səhifə

Diaspor

Marneulidə Gürcüstanlı Azərbaycanlı Gənclərin I qurultayı keçirilib

15 may 2010 17:01 (UTC +04:00)

Marneuli. Nizami Məmmədzadə-APA. Bu gün Marneulinin Nəriman Nərimanov adına Mədəniyyət Evində Gürcüstanın Azərbaycanlı Gənclərinin I qurultayı keçirilib. APA-nın Gürcüstan bürosunun məlumatına görə, qurultayda 165 nəfər nümayəndə, gürcü ali məktəblərində təhsil alan tələbələr, ictimai təşkilatların rəhbərləri, o cümlədən gənclərlə çalışan 18 təşkilatın nümayəndələri, dövlət idarələrində çalışan gənclər, Gürcüstanın və Azərbaycanın dövlət strukturlarını təmsil edən rəsmilər, hər iki ölkə parlamentinin deputatları və QHT nümayəndələri iştirak edib. Qurultayda “Azərbaycanlı gənclərin Gürcüstanın ictimai həyatında rolu” barədə çıxışlar və məruzələr dinlənilib, onların problemləri müzakirə olunub. Tədbirdə ilk söz Azərbaycanın Gürcüstandakı səfiri Namiq Əliyevə verilib. Səfir çıxışında Azərbaycan prezidenti İlham Əliyevin salamlarını qurultay nümayəndələrinə çatdırdıqdan sonra deyib ki, bu gün azərbaycanlı gənclər Gürcüstan cəmiyyətində layiqli yer tutmaq üçün böyük işlər görməlidir.

Qurultayda Azərbaycan-Gürcüstan parlamentlərarası Dostluq Qrupunun rəhbəri Qənirə Paşayeva çıxış edərək Azərbaycan parlamentinin sədri və millət vəkilləri adından yeni yaradılan gənclər qurultayını təbrik edib. O, gənclərin təşəbbüsünü alqışlayıb: “Gənclık gələcək deməkdir. Bu gün gənclərimiz təşkilatlanırsa sadəcə olaraq onları dəstəkləmək və alqışlamaq lazımdır, çünki gənclərin qarşısında çox böyük missiyalar durur.”

Tədbirdə Azərbaycanın Diasporla İş üzrə Dövlət Komitəsinin şöbə müdiri Füzuli Nəcəfov, Kvemo-Kartli Bölgə qubernatorunun müavinləri Hüseyn Yusifov və Koba Kobiaşvili, Gürcüstan parlamentinin deputatı Azər Süleymanov, Azərbaycanın Milli Məclisinin üzvləri Rauf Əliyev və Sabir Hacıyev, “Borçalı” Cəmiyyətinin sədri Zəlimxan Məmmədli, gənclərdən Kamran Xıdıroğlu, Ayaz Məmmədov, Natiq Valehoğlu, Georgi Şukakidze, Emma Bayramova, Zemfira Əzizbəyli, Zaur Darğallı və başqaları çıxış edərək gənclər qurultayında öz təkliflərini bildiriblər.
Azərbaycanın Diasporla İş Üzrə Dövlət Komitəsinin dəstəyi ilə təşkil olunan qurultayın əsas məqsədi azərbaycanlı gənclərin Gürcüstanın vətəndaş cəmiyyətinə inteqrasiyası, onların ictimai həyatda rolunun fəallaşması və bir çox vacib məsələlərin həlli istiqamətində görülən işlər qurultay nümayəndələrinin əsas müzakirə obyekti olub.
Sonra qurultay “Gürcüstanlı Azərbaycanlı Gənclər İttifaqı”təşkilatının Nizamnaməsini təstiq edib. 13 həfərdən ibarət idarə heyəti seçilib.“Gürcüstanlı Azərbaycanlı Gənclər İttifaqı”təşkilatının rəhbəri Azərbaycanlıların Mədəniyyət Mərkəzində ictimai təşkilatlarla çalışan Leyla Əliyeva seçilib.

Qurultay Azərbaycan və Gürcüstan prezidentlərinə müraciət qəbul edib.