Diaspor

Ana səhifə

Diaspor

Moskvada Rusiya Federasiyasının Azərbaycan Gənclər Təşkilatının II konfransı keçirilir

22 may 2010 14:15 (UTC +04:00)

APA-nın Moskva müxbirinin məlumatına görə, konfrans qurumun 1 illik fəaliyyəti və perspektivlərinə həsr olunub.

Tədbiri açan Rusiya Federasiyasının Azərbaycan Gənclər Təşkilatının sədri Leyla Əliyeva bildirib ki, hazırda bu qurum vətəndən kənarda ən fəal Azərbaycan gənclər təşkilatıdır: “Təşkilatın üzvləri ötən bir il ərzində bir neçə dəfə artıb, 60-dan çox yerli şöbə yaradılıb və bu şöbələr öz fəallığına görə mərkəzi təşkilatdan geri qalmırlar. Bizin fəaliyyətimizin prioritet istiqaməti Azərbaycanın zəngin tarixi-mədəni irsinin təbliği, müasir Azərbaycan reallıqlarının Rusiya ictimaiyyətinə çatdırılması, mədəniyyətlərarası dialoq, humanitar və sosial sfera, elm və təhsil sahələrində fəaliyyət və əlbəttə ki, bizim vətəndaşlarımız - Rusiya Federasiyasında təhsil alan gənclərimiz, tələbələrimizə qayğı göstərməkdir”.

L. Əliyeva deyib ki, il ərzində ən önəmli fəaliyyət istiqamətlərindən biri də Heydər Əliyev Fondu ilə bərabər “Xocalıya Ədalət” beynəlxalq kampaniyasının keçirilməsi olub. O, kampaniya çərçivəsində müxtəlif ölkələrdə Xocalı faciəsi ilə bağlı 70 aksiya keçirildiyini söyləyib: “Xocalı bizim ən böyük acımızdır və dünyanın bu faciə, eləcə də Dağlıq Qarabağ münaqişəsi haqqında məlumatlandırılması çox vacibdir. Münaqişənin ədalətli həlli və Azərbaycanı ərazi bütövlüyünün bərpası üçün bu istiqamətdə fəaliyyətimizi davam etdirəcəyik”.

Tədbirdə Azərbaycanın Rusiyadakı səfiri Polad Bülbüloğlu, Azərbaycanın gənclər və idman naziri Azad Rəhimov, Prezident Administrasiyasının Siyasi analiz və informasiya təminatı şöbəsinin sektor müdiri Elnur Aslanov, Rusiya Gənclər, İdman və Turizm Nazirliyinin departament rəhbərinin müavini İqor Melniçenko, Ümumrusiya Azərbaycanlıları Konqresinin prezidenti Məmməd Əliyev və digər şəxslər də çıxış edib.

Sonra konfrans tematik bölmələr üzrə davam edib.