Diaspor

Ana səhifə

Diaspor

Kaliforniyada “Soyqırımı: Quba” sənədli filminin təqdimat mərasimi keçirilib - FOTOSESSİYA

Kaliforniyada “Soyqırımı: Quba” sənədli filminin təqdimat mərasimi keçirilib - <font color=red>FOTOSESSİYA</font>

24 may 2010 11:48 (UTC +04:00)

Filmin ssenari müəllifi və rejissoru Etibar Məmmədov, redaktoru Kəmalə Paşayeva, elmi məsləhətçisi professor Musa Qasımlı, baş məsləhətçi millət vəkili Qənirə Paşayevadır. Sənədli film erməni daşnaklarının 1918-ci il martın 30-31-də Qubada törətdiyi soyqırımından bəhs edir.

Azərbaycan – Amerika Cəmiyyəti tərəfindən keçirilən filmin təqdimat mərasimində Azərbaycan və türk diasporunun nümayəndələri, Azərbaycanın Los-Ancelesdəki baş konsulu Elin Süleymanov, Türkiyənin Los-Ancelesdə vitse-konsulu Arif Çelik də iştirak ediblər.

Tədbirdə çıxış edən Azərbaycan-Amerika Cəmiyyətinin baş direktoru Cavid Hüseynov filmdə əks olunan tarixi hadisələr barədə məlumat verib. Filmə baxış keçirildikdən sonra çıxış edən baş konsul Elin Süleymanov bildirib ki, Azərbaycanda tarixən tolerant cəmiyyət mövcud olub və bu cəmiyyət heç vaxt “Daşnaksütyun”un etnomərkəzçi ideologiyasını qəbul etməyib. “Quba rayonu əsrlər boyu dağ yəhudilərinin azərbaycanlılarla birlikdə yaşadığı bir bölgədir ki, bu da Azərbaycan cəmiyyətində tolerantlığın və qarşılıqlı anlaşmanın hökm sürdüyünə bir misaldır”.

Daha sonra Türkiyə Amerika Assosiasiyaları Assambleyasının prezidenti Ergün Kırlıkovalı çıxış edərək bu sənədli filmin prodüserlərinin gördüyü işi yüksək dəyərləndirib. Onun sözlərinə görə, bu film I dünya müharibəsi dövründə erməni daşnaklarının Qafqazda və Anadoluda törətdiyi çoxsaylı cinayətlərdən yalnız birini əks etdirir: “Bu filmi Amerikanın elmi və akademik dairələrində yaymaq çox vacibdir. Bu, erməni radikalların yürütdüyü yalançı siyasəti faş etmiş olar və tarixi həqiqətlərin üzə çıxarılmasında yardım göstərə bilər”.

Tədbirin sonunda “Soyqırımı: Quba” filminin redaktoru, Avrasiya Beynəlxalq Tədqiqatlar İnstitutunun direktoru Kəmalə Paşayeva çıxış edərək filmin çəkilişinə hazırlıq prosesi, çəkiliş barədə məlumat verib: “Erməni təbliğat maşını müxtəlif yalançı iddialarla daşnak radikallarının böyük Ermənistan ideyasını gerçəkləşdirmək məqsədilə Anadolu və Qafqazda törətdiyi vəhşilikləri ört-basdır etmək istəyirlər. Bu filmin çəkilməsində əsas məqsəd faktları canlı şahidlərin dili ilə üzə çıxarmaqdır ki, dünya birliyi bizim nöqteyi-nəzərimizlə tanış olsun”. Kəmalə Paşayeva filmin çəkilişində dəstəyini əsirgəməyən bütün qurum və təşkilatlara öz təşəkkürünü bildirib. O rəhbərlik etdiyi Avrasiya Beynəlxalq Tədqiqatlar İnstitutunun həmçinin “Soyqırımı: Bakı” sənədli filminin çəkilişlərini başa çatdırdığını deyib. Bu film 1918-ci ildə erməni daşnaklarının Bakıda azərbaycanlılara qarşı törətdiyi soyqırımı faktından bəhs edir.