Diaspor

Ana səhifə

Diaspor

Kiyevdə 15 iyun - Qurtuluş Günü münasibətilə tədbirlər keçirilib

17 iyun 2010 12:30 (UTC +04:00)

Kiyev-APA. Dünya Azərbaycanlıları Konqresinin və Azərbaycan Respublikasının Dövlət Neft Şirkətinin Ukraynadakı nümayəndəlikləri 15 İyun - Qurtuluş Günü münasibətilə silsilə tədbirlər keçiriblər. DAK-ın Ukrayna nümayəndəliyindən APA-ya verilən məlumata görə, Kiyev şəhərindəki Heydər Əliyev adına Beynəlxalq Sosial Elmlər İnstitutuna gələn Regionlararası Heyətin İdarəolunması Akademiyasının müəllim və tələbələri, Dünya Azərbaycanlıları Konqresinin Ukraynadakı təmsilçiliyinin nümayəndələri ilk öncə Heydər Əliyevin büstü önünə tər çiçəklər qoyublar. Mərasimə qatılanları Azərbaycanın Qurtuluş Günü münasibətilə təbrik edən Heydər Əliyev adına Beynəlxalq Sosial Elmlər İnstitutunun direktoru, professor İvan Bidzura Heydər Əliyevin Azərbaycan xalqının ən ağır və məşəqqətli anında hakimiyyətə gələrək xalqını və dövlətini parçalanmaq təhlükəsindən xilas etdiyini xatırladıb.

Tədbirdə çıxış edən Dünya Azərbaycanlıları Konqresinin Ukraynada nümayəndəliyinin rəhbəri Möhlət Hüseynov və Kiyev Beynəlxalq Enerji Klubunun vitse-prezidenti Burzu Əliyev 17 il öncə Heydər Əliyevin xalqın təkidli tələbi ilə ikinci dəfə siyasi hakimiyyətə gəlişini müstəqil Azərbaycan dövlətçiliyinin məhv olmaq təhlükəsindən xilas olunduğu şərəf tarixi adlandırıblar. Onlar bu gün prezident İlham Əliyevin rəhbərliyi ilə müstəqil Azərbaycanın bölgədə lider dövlətə çevrilməsini Heydər Əliyev siyasi kursunun uğurla davam etdirilməsinin məntiqi nəticəsi kimi dəyərləndiriblər

Milli qurtuluş günü münasibəti ilə ARDNŞ-in Ukrayna təmsilçiliyinin əməkdaşları da Heydər Əliyevin xatirəsini onun Kiyev şəhərindəki abidəsinin önünə tər çiçəklər qoymaqla yad ediblər. Ukraynanın enerji sektorunun nümayəndələrinin qatıldığı tədbirdə çıxış edən nümayəndəliyin rəhbəri Elçın Məmmədov bildirib ki, 1993-cü ilin 15 iyun tarixi Azərbaycanda gərgin və şərəfli mübarizənin tarixidir: “Bu tarixi yaradan isə Azərbaycanın inkişafında, müstəqilliyində, gələcəyində müstəsna rol oynayan, daim xalqına arxalanan və xalqa arxa olan insan - ümummilli lider Heydər Əliyev olub”. Heydər Əliyevin 1993-cü ildə siyasi hakimiyyətə qayıdışı, o dövrdə çaşqınlıq şəraitində yaşayan xalqın inamını özünə qaytarmış olduğunu xatırladan natiq bu gün ölkəmizin prezident İlham Əliyevin rəhbərliyi ilə inkişaf edərək bölgənin aparıcı dövlətinə çevrilməsindən qürur hissi keçirdiyini bildirib.