Diaspor

Ana səhifə

Diaspor

İstanbulda “Cənubi şərqi Avropa əməkdaşlığı prosesi üzrə” beynəlxalq konfrans keçirilib

23 iyun 2010 08:08 (UTC +04:00)

Bakı - APA. İstanbulda “Cənubi şərqi Avropa əməkdaşlığı prosesi üzrə” beynəlxalq konfrans keçirilib. İslam Konfransı Gənclər Forumundan (İKGF) APA-ya verilən məlumata görə, İKGF və Türkiyənin rəhbərliyi altında həyata keçirilən tədbir Avropanın aparıcı gənclər təşkilatlarından olan COJEP, Avropa Şurası və Avropa Gənclər Forumunun təşkilatçılığı ilə baş tutub. Tədbir Balkan regionunda yerləşən ölkələr arasında qonşuluq münasibətlərində gənclərin rolunun gücləndirilməsinə həsr olunub.
Konfransın açılış mərasimində İKGF-nin baş katibi, səfir Elşad İsgəndərov, COJEP təşkilatının vitse-prezidenti Veysəl Filiz çıxış edərək gənc liderləri müzakirələrdə fəal olmağa və yeni ideyalarla çıxış etməyə çağırıblar.
Konfransa Yunanıstan, Xorvatiya, Bosniya, Herseqovina, Makedoniya və regionun başqa ölkələrini təmsil edən gənc liderlər qatılıblar. Tədbir çərçivəsində “Təhsil və mədəniyyətlərarası dialoq”, “Stereotiplər: KİV və vətəndaş cəmiyyəti”, “Münaqişələrin həll edilməsində gənclərin rolu”, “Gənc iş adamlarının işsizliyin aradan qaldırılmasında rolu” mövzusunda işçi qruplarda müzakirələr keçirilib.
“Münaqişələrin həll edilməsində gənclərin rolu” adlanan işçi qrupda 20-ci əsrdə baş verən humanitar fəlakətlər üzrə müzakirələr təşkil olunub. Bu seksiyada İKGF Mədəniyyətlərarası Dialoq üzrə Baş Koordinatoru Leyla Əliyevanın təşəbbüsü ilə irəli sürülən “Xocalıya ədalət” kampaniyası üzrə Litvadan olan milli koordinator Yeva Lukosevikiuyte 2008-ci ildən etibarən kampaniya çərçivəsində görülən işlər haqqında konfrans iştirakçılarına geniş məlumat verib. Kampaniyanın Cənubi-şərqi Avropa ölkələrində keçirilməsi haqqında təklif, eləcə də konfrans zamanı təsis edilmiş Cənubi-şərqi Avropa gənclər şəbəkəsinin fəaliyyət mexanizmləri yekun İstanbul bəyannaməsində öz əksini tapıb.