Diaspor

Ana səhifə

Diaspor

Berlindəki Azərbaycan diasporu Ermənistan prezidenti ilə görüşün təşkil olunduğu Konrad Adenauer Fondunun qarşında etiraz aksiyası keçirib - FOTO

23 iyun 2010 12:03 (UTC +04:00)

Diasporla İş üzrə Dövlət Komitəsinin mətbuat xidmətindən APA-ya verilən məlumata görə, iyunun 22-də Berlindəki Azərbaycan diasporunun fəalları Konrad Adenauer Fondu qarşısında etiraz piketi təşkil edərək, Ermənistan prezidentinin bu məzmunda çıxışına öz etirazlarını bildiriblər. Piketdə Azərbaycan bayraqları dalğalanıb, „Bizə Vətənimizi qaytar!“, „BMT-nin qətnamələrinə əməl et!“, „İşğalçı siyasəti dayandır!“ məzmunlu şüarlar qaldırılıb. Aksiyaçılar Dağlıq Qarabağ münaqişəsi, Xocalı faciəsi haqqında həqiqətləri əks etdirən ədəbiyyat və digər məlumatlandırıcı vasitələr paylamaqla alman ictimaiyyətinin diqqətini bu mövzuya cəlb ediblər. Almaniyadakı Azərbaycanlıların Koordinasiya Mərkəzinin təşkil etdiyi etiraz aksiyasına Alman-Azərbaycan Həmrəylik Cəmiyyəti, Berlin Azərbaycan evi, Azərbaycan Kültür Ocağı, Azərbaycan Akademiklər Birliyi, Almaniyadakı Azərbaycanlı Tələbələr və Elmi İşçilər Birliyi, Alman-Azərbaycan Akademiklər Birliyi, Bakılı klubu, LBN Boxstudio Magdeburg təşkilatının fəalları qatılıblar.

Qeyd olunub ki, yuxarıda adı çəkilən tədbiri Avropa Parlamentinin keçmiş prezidenti, Konrad Adenauer Fondunun sədri Hans-Qert Pötterinq tədbiri açıb və sözü Ermənistan prezidenti Serj Sarkisyana verib. S. Sarkisyanın nitqi əsasən birtərəfli faktlar üzərində qurulub. O öz çıxışında Cənubi Qafqazin sabit və qüdrətli bir regiona çevrilməsi üçün siyasi və iqtisadi inkişaf yollarını göstərməyə çalışsa da, əsas məqsədi Ermənistanın regiondakı əlverişli iqtisadi proyektlərə qatılmasının mühümlüyünü isbatlamaq olub. O, regionda sülhün və ədalətin bərqərar olunması üçün heç bir təklif irəli sürməyib. Ermənistan prezidentinə verilən suallarda bir çox mühüm məsələlərə toxunulub. Lakin Azərbaycanın ərazi bütövlüyü haqqında olan BMT qətnamələrinin yerinə yetirilməsi, işğal edilmiş Azərbaycan torpaqlarının, Dağlıq Qarabağ və 7 ətraf rayondan didərgin düşmüş azərbaycanlıların öz doğma ev-eşiyinə qaytarılması haqda olan suallara heç bir qənaətbəxş cavab verilməyib. Tədbirdə alman ictimaiyyətinin Azərbaycan həqiqətlərini bilən və Azərbaycanın mövqeyini dəstəkləyən nümayəndələri, Azərbaycan Respublikası Diasporla İş üzrə Dövlət Komitəsinin əməkdaşı və Azərbaycan diasporunun nümayəndələri iştirak ediblər.