Diaspor

Ana səhifə

Diaspor

Almaniyada Azərbaycan mədəniyyət gecəsi keçirilib

29 iyun 2010 22:42 (UTC +04:00)

Bakı – APA. Almaniyanın Leypsiq şəhərində azərbaycanlı tələbələr tərəfindən “Beynəlxalq Tələbə Həftəsi” çərçivəsində “Azərbaycan-Odlar yurdu” adlı tədbir təşkil olunub. Diasporla İş üzrə Dövlət Komitəsindən APA-ya verilən məlumata görə, tədbir Leypsiq şəhərinin mərkəzində yerləşən Moritzbastei adlı qədim qalada keçirilib.

Tədbirin əsas iştirakçıları Leypsiq Universitetinin professor və doktor heyəti, yerli və xarici tələbələrlə yanaşı, Leypsiq şəhərinin sakinləri olublar.

Azərbaycanın Almaniya Federativ Respublikasındakı səfirliyinin birinci katibi Fikrət Axundov tədbirdə çıxış edərək, Azərbaycan Respublikasının yaranması, keçdiyi inkişaf yolları, Azərbaycan-Almaniya əlaqələri haqqında ətraflı məlumat verib. Diplomat çıxışında Dağlıq Qarabağ probleminə də toxunub, münaqişə barədə həqiqətləri tədbir iştirakçılarının diqqətinə çatdırıb.

Almaniyada yaşayan Azərbaycanlıların Koordinasiya Mərkəzinin sədri Samirə Patzer-İsmayılova çıxışında Azərbaycanın çoxəsrlik tarixə malik mədəniyyəti, zəngin təbiəti və turizmin inkişafı barədə məlumat verib.

Çıxışlardan sonra “Welcome to Azerbaijan” adlı promo-video təqdim olunub.

Tədbirin xüsusi qonağı, Amerikanın Nyu-Cersi ştatından dəvət olunmuş Cefri Verbok “Azərbaycan muğamı” adlı təqdimatla çıxış edib. C. Verbok tərəfindən muğamın tarixi kökləri və əsasları haqqında verilən məlumatlar, tar və kamançanın təqdimatı xüsusi maraq doğurub. Amerikalı qonaq muğamın beşiyi olan Qarabağın erməni işğalçıları tərəfindən zəbt olunduğunu xüsusi vurğulayıb.

Tədbirin ikinci hissəsində təqdim olunan Azərbaycanın xörəkləri və şirniyyatları - plov, dolma, dovğa, şəkərbura, paxlava və s. iştirakçıların mətbəximizlə yaxından tanış olmasına imkan verib. Bundan başqa, tədbirdə səfirlik tərəfindən təqdim olunan, Qarabağ həqiqətlərini əks etdirən kitablar və videolar paylanıb. Gecə Azərbaycan musiqiləri və rəqsləri ilə başa çatıb.