Diaspor

Ana səhifə

Diaspor

Bu il Gürcüstan ali məktəblərində təhsil alan azərbaycanlı tələbələrin sayı 500 nəfərdən çox olacaq

05 iyul 2010 13:41 (UTC +04:00)

Tiflis. Nizami Məmmədzadə - APA. Gürcüstan paytaxtında və digər şəhərlərdə etnik azlıqların ali məktəblərə vahid milli qəbul imtahanları başlayıb. APA-nın Gürcüstan bürosunun məlumatına görə, bütün Gürcüstan üzrə 36 min 421 nəfər abituriyent qeydiyyatdan keçib. Onların 30 minindən çoxu tələbə adını qazanacaq.

Azərbaycanlı abituriyentlər paytaxt Tiflislə yanaşı, Telavi və Rustavi şəhərlərində imtahan veriblər. Azərbaycanın Gürcüstandakı səfirliyinin əməkdaşı Fəxri Hacıyev Gürcüstan ali məktəblərinə indiyədək 335 nəfər azərbaycanlının sənəd verdiyini söyləyib: “İmtahan Tiflis şəhərində Dövlət Aqrar Universitetinin əsas binasında keçirilir və 248 azərbaycanlı abituriyent imtahanda iştirak edir. Rustavidə 79 nəfər, Telavidə isə 8 nəfər azərbaycanlı abituriyent imtahan verməlidir. Soydaşlarımızın kompakt yaşadığı Marneuli bölgəsindən 188 nəfər soydaşımız vahid milli imtahanlara qatılıb.”

Azərbaycanlıların Mədəniyyət Mərkəzinin sədri Fazil Həsənov bildirib ki, bu il Gürcüstan ali məktəblərində təhsil alan azərbaycanlı tələbələrin ümumi sayı 500 nəfərdən çox olacaq: “Bu, bizim üçün çox fərəhli hadisədir. İnanıram ki, gürcü ali məktəblərində azərbaycanlı tələbələrin sayı artdıqca müxtəlif idarə və təşkilatlarda, eyni zamanda anadilli məktəblərimizdə azərbaycanlı kadrların qıtlığı getdikcə azalacaq”.

gürcüstan_azərbaycan