Diaspor

Ana səhifə

Diaspor

Millət vəkili Qənirə Paşayevanın “Quzey Kıprıs və Kıprıs Türkləri” kitabının təqdimat mərasimi keçirilib - FOTOSESSİYA

Millət vəkili Qənirə Paşayevanın “Quzey Kıprıs və Kıprıs Türkləri” kitabının təqdimat mərasimi keçirilib - <font color=red>FOTOSESSİYA</font>

17 iyul 2010 11:45 (UTC +04:00)

Bakı. Hafiz Heydərov - APA. Bu gün Azərbaycan Atatürk Mərkəzində millət vəkili Qənirə Paşayevanın “Quzey Kıprıs və Kıprıs Türkləri” kitabının təqdimat mərasimi keçirilib.

APA-nın məlumatına görə, mərasimdə Azərbaycanın millət vəkilləri, ziyalılar, yazıçı və publisistlər, habelə Türkiyə Respublikasının Azərbaycandakı səfirliyinin nümayəndələri iştirak ediblər.

Tədbiri giriş sözü ilə açan Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid “Quzey Kıprıs və Kıprıs Türkləri” kitabı haqqında fikirlərini səsləndirib.

Kitabın müəllifi, millət vəkili Qənirə Paşayeva bu işin “Türk dünyasını tanıyaq və tanıdaq” layihəsinin tərkib hissəsi olduğunu deyib. Bu gün türk dilli xalqların bir-birini daha yaxından tanımasının vacibliyindən danışan Q.Paşayeva bu istiqamətdə ciddi işlərin görüldüyünü qeyd edib: “Türk xalqları bir-birlərini daha yaxından tanımalıdırlar ki, bir-birinə sahib çıxsınlar. Bu məqsədlə də biz bu işə başladıq. Mən hələ jurnalist olduğum dövrlərdə Türkiyədə, həmçinin Quzey Kıprısda olduğum zaman gəzdiyim, gördüyüm yerləri bir kitab halında nəşr etdirməyi qarşıma məqsəd qoymuşdum. İlk olaraq Bursa ilə bağlı bir layihə həyata keçirdik. İkinci Quzey Kıprıs və Kıprıs türkləri ilə bağlı daha bir layihə gerçəkləşdirdik. Yaxın zamanlarda isə Krım türkləri ilə bağlı daha bir layihəni həyata keçirmək niyyətindəyik. Bütün bu layihələri həyata keçirməkdə məqsədimiz Azərbaycan xalqını türk xalqları ilə daha yaxından tanış etməkdən ibarətdir. Hesab edirəm ki, bu kitab Azərbaycan oxucusu üçün müsbət mənada yararlı olacaq”. Q.Paşayeva həmçinin Azərbaycan xalqını, xüsusilə də gəncləri bu kitabla tanış olmağa çağırıb.

Quzey Kıprıs Türk Cümhuriyyətinin Azərbaycandakı nümayəndəsi Zəki Cazioğlu Q.Paşayeva tərəfindən ərsəyə gətirilən “Quzey Kıprıs və Kıprıs Türkləri” kitabının çox əhəmiyyətli olduğunu və bu kitabda zəruri məlumatların yer aldığını qeyd edib: “İnanıram ki, bu kitab xalqlarımızın biri birini daha yaxından tanımasına yardımçı olacaq. Burda çox əhəmiyyətli bilgilər yer alıb. Hətta mən bu kitabdan Quzey Kıprısla bağlı bilmədiklərimi oxudum”. Z.Cazioğlu həmçinin ərsəyə gətirilən “Quzey Kıprıs və Kıprıs Türkləri” kitabının ölkələr arasında turizmin inkişafına da dəstək ola biləcəyini bildirib.

Türkiyə Cumhuriyyətinin Azərbaycandakı səfirliyinin müşaviri Q.Paşayevanın türk xalqları, onların tarixi və mədəniyyətinin təbliğində böyük xidmətləri olduğunu qeyd edib. O, bir türk qadınının bu xidmətlərinə xüsusi dəyər verdiklərini, Q.Paşayevaya hər zaman dəstək verməyə hazır olduqlarını bəyan edib.

Daha sonra tədbirdə çıxış edən APA İnformasiya Agentliyinin baş direktoru Vüsalə Mahirqızı türk dünyasına uğurlu xidmətlərinə görə millət vəkilinə təşəkkür edib. O, Q.Paşayeva tərəfindən ərsəyə gətirilmiş olan bu kitabda çox böyük siyasi faktların, Kıprıs türklərinin mədəniyyəti və folkloru barədə dolğun məlumatların əks olunduğunu deyib. Quzey Kıprıs mədəniyyətinin Azərbaycan mədəniyyəti ilə oxşar olduğunu qeyd edən V.Mahirqızı bu gün Quzey Kıprıs Türk Cümhuriyyətinin dünyada, eləcə də Azərbaycanda tanıdılmasının zəruri olduğunu bildirib: “Məhz bu baxımdan bu kitabı çox əhəmiyyətli hesab edirəm. Kitabın rus və ingilis dillərində nəşr olunmasını, həmçinin internet səhifəsinin açılmasını vacib sayıram”.

Türkiyə Beynəlxalq Strateji Araşdırmalar Mərkəzinin rəhbəri Cəlal Cem Oğuz millət vəkili Q.Paşayevanın bu layihəsinin türk xalqlarının birləşməsinə xidmət etdiyini söyləyib: “Qənirə xanım uzun illərdən bəri bu istiqamətdə çox böyük işlər görüb. Biz Qənirə xanımın bu xidmətlərini yüksək dəyərləndirik”. O, türk xalqlarının tarixi və mədəniyyətinin təbliği üçün yorulmadan çalışan Azərbaycanın millət vəkilinə uğurlar diləyib.

Azərbaycan Milli Məclisinin deputatı Həvva Məmmədova isə həmkarının bu layihəsini çox önəmli və uğurlu adlandırıb. Kitabda Kıprıs türklərinin tarixi, onların həyat tərzi və mədəniyyəti barədə geniş məlumatların yer aldığını diqqətə çatdıran millət vəkili bunun Azərbaycan xalqına böyük töhfə olduğunu söyləyib: “İnanıram ki, bu kitab xalqlarımız arasındakı dostluq və qardaşlıq münasibətlərinin daha da yaxınlaşmasına xidmət edəcək. Türk dünyasının zəngin tarixi və mədəniyyəti var. Biz hər zaman bunu öyrənməli və təbliğ etməliyik”.

Türkdilli Ölkələrin Parlament Assambleyasının Azərbaycandakı nümayəndəsi Gürşad Melik Sarıaslan kitabın Kıprıs türklərinə böyük hədiyyə olacağını qeyd edib: “İyulun 20-si Kıprıs türklərinin bayramıdır. Ona görə də bu kitabın Quzey Kıprıs Türk Cümhuriyyətində də təqdimatı olacaq”.

Mərasimə qatılan digər millət vəkilləri, ziyalılar və yazıçı publisistlər Q.Paşayevanı bu uğurlu layihə münasibətilə təbrik ediblər.