Diaspor

Ana səhifə

Diaspor

Avropa Azərbaycanlılarının Koordinasiya Mərkəzi Almaniyanın ARTE teleşirkətinə etirazını bildirib

26 iyul 2010 07:43 (UTC +04:00)

Bakı-APA. İyulun 14-də Almaniyanın ARTE kanalı ilə Dağlıq Qarabağ probleminə həsr olunan “Dünyanın yüksək zirvələrində” (“Auf den Gipfeln der Welt“) sənədli filmi nümayiş olunub, iyulun 21-də film bir daha təkrar edilib. Filmi fransız rejissoru Jan Mari Barrer çəkib və həmin regionun təbii sərvəti olan uca dağlarından bəhs edən bu filmdə siyasi aspektlərə toxunaraq onları təhrif edib. Bu barədə APA-ya Diasporla İş üzrə Dövlət Komitəsinin mətbuat xidmətindən bildirilib. Məlumata görə, sənədli film Dağlıq-Qarabağdakı hadisələri birtərəfli, erməni nöqteyi-nəzərindən şərh edərək, faktları qondarma və yalan şəklində tamaşaçıya təqdim edib.
Bununla əlaqədar Avropa Azərbaycanlılarının Koordinasiya Mərkəzi (AAKM) ARTE teleşirkətinə yazılı şəkildə öz etirazını bildirib. Məktubda hadisələrin obyektiv şəkildə işıqlandırılmaması, problemə birtərəfli münasibət, daha dəqiq qeyd etsək, problemə ermənipərəst mövqedən yanaşılması vurğulanıb, jurnalist etikasına yad olan və zəif araşdırmaların aparılması tənqid edilib, plüralizm hakim olan demokratik bir cəmiyyətdə media tərəfindən faktların təhrifinə yol verilməsi halı mənfi qiymətləndirilib. Etiraz məktubunda Dağlıq-Qarabağ həqiqətləri, Xocalı faciəsi haqda, yüz minlərlə azərbaycanlı qaçqın və məcburi köçkünlərin taleyi barədə məlumat verilib, Dağlıq Qarabağ münaqişəsinin dini əsasda olmaması qeyd edilib.
AAKM ARTE televiziya şirkətinə belə bir təbiət proqramlarında siyasətə toxunularkən hər iki xalqın taleyinin həqiqi faktlarının açıqlanmasını tövsiyə edib.
AAKM qeyd edib ki, bu sivil cəmiyyətimizin iflasa uğraması deməkdi və Avropa mediasının etikasına uyğun deyil.
AAKM belə filmlərin nümayişinə gələcəkdə yol verilməməsini tələb edib.