Diaspor

Ana səhifə

Diaspor

Gürcüstanda yaşayan azərbaycanlı gənclərin Azərbaycana səfəri başlayıb

27 iyul 2010 08:13 (UTC +04:00)

Bakı. Viktoriya Dementyeva – APA. Gürcüstanda yaşayan azərbaycanlı tələbələr və gənclər təşkilatları nümayəndələrinin Azərbaycana səfəri başlayıb. APA-nın xəbərinə görə, səfər Diasporla İş üzrə Dövlət Komitəsinin həyata keçirdiyi layihə əsasında baş tutub. Nümayəndə heyətinin üzvləri Fəxri Xiyabanda Heydər Əliyevin, akademik Zərifə Əliyevanın məzarlarını, Şəhidlər Xiyabanını ziyarət ediblər.
Diasporla İş üzrə Dövlət Komitəsinin şöbə müdiri Fizuli Nəcəfov jurnalistlərə açıqlamasında deyib ki, komitənin həyata keçirdiyi layihə çərçivəsində artıq beş ildir ki, Gürcüstanda yaşayan gənclərin Azərbaycana hər il səfərləri təşkil olunur. Onun sözlərinə görə, bu səfərlər Gürcüstanda yaşayan gənc azərbaycanlıların Azərbaycanla əlaqələrini qoruyub saxlamaq, Azərbaycan tarixi və mədəniyyəti ilə daha yaxından tanış olmaları məqsədi ilə həyata keçirilir.
Nümayəndə heyətinin Heydər Əliyev Fondunda görüşləri, İçərişəhərlə tanışlıqları nəzərdə tutulub. Bir həftə davam edəcək səfər proqramı çərçivəsində gənclərin istirahətləri də təşkil ediləcək.
F. Nəcəfov Gürcüstanda yaşayan azərbaycanlıların həmişə Azərbaycan dövlətinin diqqət mərkəzində olduqlarını deyib: “Onların problemləri bizi də həmişə narahat edir. 2004-cü ildə Gürcüstanda yaşayan azərbaycanlılar bu ölkəni kütləvi tərk etməyə başladılar. Onların əsas problemi gürcü dilini bilməmələridir. Ona görə də, Diaspora İş üzrə Dövlət Komitəsinin dəstəyi ilə 2008-ci ildə Gürcüstanda Azərbaycan dilli məktəblərdə 50, 2009-cu ildə isə 80 gürcü dili kursu yaradılıb”.