Diaspor

Ana səhifə

Diaspor

Bakıda səfərdə olan Gürcüstanda yaşayan azərbaycanlı gənclərin millət vəkili Qənirə Paşayeva ilə görüşü keçirilib - FOTO

Bakıda səfərdə olan Gürcüstanda yaşayan azərbaycanlı gənclərin millət vəkili Qənirə Paşayeva ilə görüşü keçirilib - <font color=red>FOTO</font>

31 iyul 2010 13:58 (UTC +04:00)

Bakı-APA. Azərbaycanda səfərdə olan Gürcüstandakı azərbaycanlı tələbə və gənclər təşkilatlarının bir qrup nümayəndəsinin millət vəkili, Milli Məclisin (MM) Azərbaycan-Gürcüstan Parlamentlərarası Dostluq Qrupunun rəhbəri Qənirə Paşayeva ilə görüşü keçirilib. APA-nın xəbərinə görə, görüşü açan Diasporla İş üzrə Dövlət Komitəsinin şöbə müdiri Füzuli Nəcəfov Q. Paşayevanın dəfələrlə Gürcüstanda olduğunu, bu ölkədə yaşayan azərbaycanlılarla çoxsaylı görüşlər keçirdiyini, onların problemlərinin həlli istiqamətində böyük səylər göstərib, böyük işlər gördüyünü deyib.
“Bura sizlərin də Vətəni sayılır” deyə bildirən Q. Paşayeva iştirakçıların çoxunu yaxından tanıdığını deyib. Q. Paşayeva “millətinin tarixini bilməyən insana bütöv insan kimi baxmıram”- deyə bildirib və əlavə edib ki, tarixən Gürcüstanda, öz ata-baba yurdlarında yaşayan azərbaycanlılar, xüsusilə gənclər Gürcüstanla yanaşı, Azərbaycan xalqının tarixini və mədəniyyətini geniş şəkildə öyrənməli və təbliği istiqamətində öz bilik və bacarıqlarını əsirgəməməlidirlər.
Millət vəkili deyib ki, harada yaşamasından asılı olmayaraq Azərbaycanın torpaqlarının 20 faizinin Ermənistan tərəfindən işğal olunması, bir milyon azərbaycanlının qaçqın və məcburi köçkün həyatı yaşaması hər bir azərbaycanlını ciddi narahat etməlidir və onlar ermənilərin yalan təbliğatlarının qarşısının alınması istiqamətində və Azərbaycan həqiqətlərinin yayılması istiqamətində fəal iş aparmalıdırlar. Millət vəkili gənclərə Heydər Əliyev Fondunun prezidenti, millət vəkili Mehriban Əliyevanın təşəbbüsü ilə bu istiqamətdə görülən işlər barədə də danışıb.

Q. Paşayeva deyib ki, Azərbaycandan kənarda o cümlədən Gürcüstanda yaşayan azərbaycanlılar daim Azərbaycan dövlətinin və Prezidentinin diqqət mərkəzindədir. O, Prezident İlham Əliyevin göstərişləri əsasında Gürcüstanda həyata keçirilən layihələri və Heydər Əliyev Fondunun həyata keçirdiyi layihələri də xatırladıb və vurğulayıb ki, bu cür işlər iki ölkə arasındakı münasibətləri daha da inkişaf etdirmək, Gürcüstanın inkişafına dəstək göstərməklə yanaşı, xüsusilə orada yaşayan azərbaycanlıların həyat şəraitinin, təhsilinin daha da yaxşılaşdırılmasına xidmət edir.

Qeyd edək ki, Gürcüstandakı azərbaycanlı tələbə və gənclər təşkilatlarının bir qrup nümayəndəsinin Azərbaycana səfəri “Gürcüstanda yaşayan azərbaycanlıların Gürcüstan cəmiyyətinə inteqrasiyası ilə bağlı tədbirlər planı”na uyğun olaraq Gürcüstanda yaşayan gənclərin tarixi vətənləri ilə əlaqələrinin möhkəmləndirilməsi, milli-mənəvi dəyərləri, mədəniyyəti haqqında daha da geniş şəkildə məlumatlandırılması və yay tətilinin səmərəli təşkili məqsədi ilə reallaşdırılıb. Layihə artıq 4 ildir Diasporla İş üzrə Dövlət Komitəsinin dəstəyi ilə gerçəkləşdirilir.
74 nəfərdən ibarət olan nümayəndə heyətinin Azərbaycana səfəri bu gün başa çatır.