Diaspor

Ana səhifə

Diaspor

Gürcüstanlı soydaşlarımız Şimali Kipr Türk Cümhuriyyətində pulsuz təhsil alacaqlar

13 sentyabr 2010 07:47 (UTC +04:00)

Marneuli. Nizami Məmmədzadə-APA. Dünən Gürcüstanın müxtəlif bölgələrində yaşayan soydaşlarımız Şimali Kipr Yaxın Doğu Universitetində (Near East University) təhsil almaq üçün müsabiqədən keçib. APA-nın Gürcüstan bürosunun məlumatına görə, bu təhsil ocağına seçim etmək üçün dövlət strukturlarının, Gürcüstanda fəaliyyət göstərən Azərbaycan cəmiyyətlərinin, universitet rəhbərlərinin və ictimaiyyət nümayəndələrinin, ziyalıların, jurnalistlərin və Azərbaycanın Diasporla İş üzrə Dövlət Komitəsinin şöbə müdiri Füzuli Nəcəfovun, Azərbaycanlıların Mədəniyyət Mərkəzinin (AMM) sədri Fazil Həsənovun iştirakı ilə komissiya yaradılıb. Müsabiqədə Tiflis, Kaspi, Marneuli, Rustavi və Qardabani rayonlarından gələn və bu il test imtahanları ilə Gürcüstanın gürcü ali məktəblərinin hazırlıq kurslarına qəbul olan və orta məktəbləri yenicə bitirən gənclər iştirak edib. Qəbul prosesi AMM-in təşkilatçılığı ilə həyata keçirilib.

Məlumata görə, müsabiqədən 20 nəfər gənc soydaşımız uğurla keçib. Azərbaycanın Diasporla İş üzrə Dövlət Komitəsinin şöbə müdiri Füzuli Nəcəfov müsabiqədən keçən gəncləri təbrik edib, onlara uğurlar arzulayıb və tələbələri maraqlandıran suallara cavab verib. Komitə rəsmisi gənc soydaşlarımıza ingilis dilini, eyni zamanda gürcü dilini mükəmməl öyrənməyi, hazır kadr kimi vətənə dönməyi və Gürcüstanın müvafiq dövlət və hökumət strukturlarında səmərəli fəaliyyət göstərməyi arzulayıb: “Bu, Azərbaycan dövlətinin gənc azərbaycanlı soydaşlarımıza qayğısının təzahürüdür. Məqsədimiz odur ki, Gürcüstanda azərbaycanlı soydaşlarımız hakimiyyət strukturlarında çalışsın, bu ölkənin layiqli vətəndaşları kimi öz millətini müxtəlif sahələrdə təmsil etsin”.

AMM-in rəhbəri Fazil Həsənov APA-ya açıqlamasında bildirib ki, Kiprin Yaxın Doğu Universitetinə qəbul olunan tələbələr sentyabrın 15-də bu ölkənin paytaxtı Lefkoşaya yola düşəcəklər: “Bu layihə Azərbaycan dövlətinin təklifi ilə həyata keçir. Azərbaycanın Diasporla İş üzrə Dövlət Komitəsinin Yaxın Doğu Universiteti ilə imzaladığı protokol əsasında Gürcüstanın müxtəlif bölgələrindən seçilən gənclərimiz oraya beş il müddətinə ali təhsil almağa göndərilir. Gənclərimiz hazırlıqlıdır. Biz onları universitetin şərtlərinə uyğun komissiyanın üzvlərinin iştirakı ilə seçdik. Bu, ilk addımdır. Yaxın Doğu Universiteti tələbələri güzəştli şərtlərlə qəbul edib. Tələbələr Azərbaycan dövlətinin və Yaxın Doğu Universitetinin köməkliyi ilə təhsil haqqından tam azad edilir və pulsuz yataqxana ilə təmin olunacaqlar. Tələbələr Kiprdə ingilis dilində bir il hazırlıq kursu keçəcəklər. Bu, artıq Gürcüstanda yaşayan azərbaycanlı gənclərin xariclə əlaqəsinin möhkəmləndirilməsi deməkdir. Biz universitet rəhbərliyini Gürcüstana dəvət etməyi planlaşdırırıq. Gələcəkdə bu təhsil ocağında 10 nəfər gürcü gəncinin təhsil alması planlaşdırılır. Bu, çox yaxşı fikirdir. Gələcəkdə onlar azərbaycanlı tələbələrlə dostluq şəraitində təhsil alıb, vətənə dönəndən sonra birlikdə müxtəlif idarə və təşkilatlarda çalışacaqlar. Bütün bunlar üçün biz Azərbaycan dövlətinə təşəkkür edirik. Ümid edirik ki, bu layihə gələcəkdə də davam edəcək və azərbaycanlı gənclər həmişə düşünəcəklər ki, onların arxasında duran Azərbaycan xalqı və dövləti var”.

Qeyd edək ki, Yaxın Doğu Universitetində 55 ölkədən 18.000 tələbə təhsil alır. Bu universitet Letkoşada yüksək səviyyəli təhsil imkanları və yüksək ixtisaslı müəllim kollektivi ilə fəaliyyət göstərən ali təhsil ocağıdır. Yaxın Doğu Universiteti Türkiyənin Yüksək Öyrətim Qurumunun (YÖK), Avropa Universitetlər Birliyinin (EUA), UNESCO nəzdindəki Dünya Universitetlər Birliyinin (İAU), Beynəlxalq Mühəndislik Təhsili Təşkilatının (İGİP), Beynəlxalq Seçkin Tibbi Akreditasiya Qurumunun (JCİ) və İslam Dünyası Universitetlər Federasiyasının (FUİW) tamhüquqlu üzvüdür.