Diaspor

Diaspor

Litvanın bütün ümumtəhsil məktəblərində “Azərbaycan mənim gözlərimlə” adlı müsabiqə elan olunub

13 sentyabr 2010 14:28 (UTC +04:00)

Bakı-APA. Yenicə başlanmış dərs ilinin əvvəlində Litva Respublikasının bütün ümumtəhsil məktəblərində “Azərbaycan mənim gözlərimlə” adı altında müsabiqə elan olunub. Diasporla iş üzrə Dövlət Komitəsinin mətbuat xidmətindən APA-ya verilən məlumata görə, müsabiqə sentyabr-oktyabr aylarında keçirilir və bu tədbirdə Litvanın ümumtəhsil məktəblərinin 7-12-ci siniflərdə oxuyan şagirdlər iştirak edirlər. Litvada 1442 ümumtəhsil müəssisəsi fəaliyyət göstərir və təhsil əsasən Litva dilində aparılır. Amma, bununla yanaşı, burada dövlət və yaxud bələdiyyə büdcəsindən maliyyələşdirilən polyak, rus, belarus, alman dillərində orta məktəblər də var. Sözügedən müsabiqə bu məktəblərin şagirdlərinə də aiddir. 1990-cı il martın 11-də Litvanın Dövlət müstəqilliyinin bərpasından sonra, ilk dəfədir ki, bu istiqamətdə və bütün ölkə miqyasında beynəlxalq maarifləndirmə layihəsi həyata keçirilir. Məlumatı Diasporla İş üzrə Dövlət Komitəsinin Litva Azərbaycanlıları Cəmiyyətinin sədri Mahir Həmzəyev verib.
Müsabiqəni Litva Azərbaycanlıları Cəmiyyəti Litva Respublikasının Təhsil və Elm nazirliyi, Litva Milli İcmalar Evi və Litva gənclərinin turizm mərkəzi ilə birgə təşkil edib. Layihənin maliyyə dəstəyini isə Azərbaycan Respublikasının Diasporla iş üzrə Dövlət Komitəsi verib. Litva Respublikasının Təhsil və Elm naziri Gintaras Steponaviçyus sözügedən müsabiqənin təşkil edilməsi barədə Cəmiyyətin təşəbbüsü ilə bu ilin iyul ayında xüsusi sərəncam imzalayıb, müsabiqənin Əsasnaməsini və bu tədbirlə əlaqədar digər sənədləri təsdiq edib.
Sənəddə göstərilir ki, müsabiqə Litva-Azərbaycan mədəniyyətlərarası bilgilərinin genişləndirilməsinə həsr edilir və onu keçirməkdən məqsəd şagirdlərdə Azərbaycanın qədim keçmişinə, dövlətçilik tarixinə, mədəni irsinə, coğrafiyasına, təbiətinə maraq oyatmaq, informasiya texnologiyalarından istifadə yolu ilə şagirdlərə Azərbaycanla bağlı fikir və düşüncələrini ifadə etmək üçün imkan yaratmaqdır.

Müsabiqə işləri oktyabrın 25-nə qədər Litva gənclərinin turizm mərkəzinin ünvanına göndəriləcək. Həmin işləri münsiflər komissiyası dəyərləndirəcək və bu zaman, müsabiqə materiallarında Azərbaycan Respublikasına məxsus və bənzəri olmayan xüsusiyyətlərin geniş açılması, bədiilik, orijinallıq, sərbəst yaradıcılıq məharəti, informasiya texnologiyalarının yaratdığı imkanlardan istifadə bacarığı daha çox nəzərə alınacaq.

Müsabiqə haqqında müvafiq bilgilər Litva kütləvi informasiya vasitələri ilə artıq yayımlanmağa başlayıb.

Litva-müsabiqə