Diaspor

Diaspor

Dünya Azərbaycanlıları Konqresinin növbəti qurultayı təşkilat rəhbərlərinin seçkilərdə iştirakı ilə əlaqədar dekabra təxirə salınıb

22 sentyabr 2010 10:45 (UTC +04:00)

Bakı. Ramil Məmmədli-APA. Dünya Azərbaycanlıları Konqresinin (DAK) Daimi Şurasının sədri Əjdər Tağızadə mətbuat konfransı keçirib.

APA-nın məlumatına görə, Ə. Tağızadə deyib ki, DAK-ın XI qurultayının sentyabrın 18-19-da Almaniyanın Frankfurt şəhərində keçirilməsi nəzərdə tutulsa da, sonradan bu tədbir təxirə salınıb. Onun sözlərinə görə, DAK-ın rəhbərliyində təmsil olunan şəxslərin Milli Məclisə keçirilən seçkilərdə iştirakı qurultayın keçirilmə vaxtında dəyişikliyə səbəb olub. DAK-ın Qurultaya Hazırlıq üzrə Təşkilat Komitəsinin sözçüsü olduğunu qeyd edən Ə. Tağızadə XI qurultayın Almaniyanın Bonn şəhərində dekabrın birinci ongünlüyündə keçiriləcəyini söyləyib.

DAK sözçüsü qeyd edib ki, qurultay ərəfəsində təmsil etdiyi qurum İran türklərinin haqları ilə bağlı bir sıra tədbirlər də keçirəcək: “11 dekabr Dünya İnsan Haqları Günü və 12 dekabr “21 Azər” Hərəkatı ilə bağlı Almaniyada və digər ölkələrdə də tədbirlərimiz olacaq”. Ə. Tağızadə XI qurultayda Qulamrza Səbri Təbrizinin başçılıq etdiyi DAK-la birləşməklə bağlı gedən informasiyalara da münasibət bildirib: “Dünyada bir DAK var. O, da beynəlxalq təşkilat kimi dünyanın bir çox ölkələrində qeydiyyatdan keçən və bizim təmsil olunduğumuz DAK-dır. Digər DAK adlı təşkilatların rəhbərləri bizim konqresdən çıxıb gedənlərdir. DAK-dan çıxıb bu adda bir təşkilat yaradan hər kəslə sonradan birləşmək adlı sənəd imzalamaq fikrimiz yoxdur. Bütün bu barədə gedən yazılar həqiqətə uyğun deyil”.

Ə. Tağızadə İranda Azərbaycan türklərinin hüquqları ilə bağlı da danışıb. O deyib ki, İrandan Azərbaycan Respublikasına səfər edən azərbaycanlıların əksəriyyəti öz ölkəsinə qayıtdıqdan sonra təzyiqlərə məruz qalır və hüquq-mühafizə orqanları tərəfindən istintaqa cəlb olunurlar.