Diaspor

Diaspor

İranda 30 milyon azərbaycanlının ana dilində təhsil hüququndan məhrum olması ilə bağlı YUNESKO-ya müraciət olunub

18 oktyabr 2010 09:01 (UTC +04:00)

Bakı. Ramil Məmmədli-APA. YUNESKO Güney Azərbaycanda 30 milyon Azərbaycan türkünün ana dilində təhsil almasına qoyulan qadağaları araşdıracaq.

Güney Azərbaycan Milli Azadlıq Cəbhəsinin (GAMAC) mətbuat xidmətindən APA-ya verilən məlumata görə, İranda 30 milyon azərbaycanlının ana dilində təhsil almasına qoyulan qadağalar və bu dilin məhv olma təhlükəsi ilə bağlı UNESCO-ya məktubla müraciət edib. Məktubda 30 milyon azərbaycanlının ana dilində təhsil alma hüququndan məhrum olması, İranın dövlət səviyyəsində apardığı ayrı-seçkilik siyasəti nəticəsində azərbaycanlıların öz dilini itirilməsi təhlükəsinin kritik vəziyyətdə olduğu faktlarla izah olunub.

Məktubda qeyd olunub ki, 1925-ci ildə I Rza Pəhləvinin mərkəzləşmiş hakimiyyət və dövlət qurmaq məqsədilə ortaya atdığı “Vahid dil, vahid millət, vahid ölkə!” şüarı ilə orada yaşayan qeyri-fars millətlərin dilləri yasaqlandı və qeyri-rəsmi dil kimi tanınaraq məktəblərdə bu dillərə qadağa qoyulub: “Bu günkü hakimiyyət da milli və mədəni kimliyini qorumağa çalışan qüvvələri davamlı şəkildə planlaşdırılmış hərbi siyasi basqı altında saxlamaqdadır.

Məktubda azərbaycanlıların dillərinin məhvinin qarşısının alınması üçün təcili addımların atılmasının zəruriliyi, eləcə də YUNESKO mütəxəssisləri tərəfindən İranda Azərbaycan türklərinin ana dilinin Məhv olmaqda olan Dünya Dilləri Atlasına əlavə edilməsi xahiş olunub.