Diaspor

Diaspor

ABŞ-dakı Azərbaycan diasporu “Müharibə və sülh şəraitində yaşayan insanların əhvalatı” filminə etiraz olaraq PBS telekanalına məktub göndərib

20 oktyabr 2010 13:37 (UTC +04:00)

Vaşinqton. İzabel Levin-APA. ABŞ-dakı Azərbaycan diasporu PBS (İctimai Yayım Xidməti) kanalında yayımlanması planlaşdırılan “Müharibə və sülh şəraitində yaşayan insanların əhvalatı” filminə etiraz olaraq telekanala məktub göndərib. Bu barədə APA-nın Vaşinqton müxbirinə Azərbaycan-Amerika Şurası və Azərbaycan-Amerika Cəmiyyətindən bildiriblər.

“Azərbaycan-Amerika ictimaiyyətinin nümayəndələri və vergi ödəyiciləri olaraq “Müharibə və sülh şəraitində yaşayan insanların əhvalatı” adlı Ermənistanın istehsal etdiyi sənədli filmin oktyabrın 24-də PBS telekanalında yayımlanacağından hədsiz dərəcədə narahatıq. Ermənistan və Azərbaycan arasında Dağlıq Qarabağ münaqişəsindən bəhs edən, Vardan Hovanisyanın müəllifi olduğu bu sənədli film PBS tamaşaçılarına mübahisəli tarixi təhrif olunmuş şəkildə çatdıracaq.

Bu sənədli film ağrılı Dağlıq Qarabağ münaqişəsi barədə təhrif olunmuş məlumat verərək onu Qarabağda ermənilərin Azərbaycana qarşı azadlıq mübarizəsi kimi təqdim edir.

Filmdə 1991-1994-cü illərdə baş vermiş hadisələr barədə, erməni qoşunlarının Azərbaycanın Dağlıq Qarabağ bölgəsi və yeddi ətraf rayonunu işğal etməsi, 800 000 çox azərbaycanlının etnik təmizləməyə məruz qalması, 30 min nəfərin öldürülməsi barədə məlumat verilmir. 1994-cü ildə atəşkəs elan olunandan bəri erməni qoşunları Azərbaycanın beynəlxalq səviyyədə (həmçinin ABŞ tərəfindən) tanınan ərazisinin 16 faizindən çoxunu işğal altında saxlayır, yüz minlərlə azərbaycanlı doğma yurd-yuvalarına qayıda bilmir.

BMT Təhlükəsizlik Şurasının 1993-cü ildən bəri qəbul etdiyi dörd qətnamə (822, 853, 874, 884 saylı qətnamələr) və Baş Məclisin bir neçə qətnaməsi erməni işğalını pisləyib və erməni qoşunlarının dərhal Azərbaycan torpaqlarından qeydsiz-şərtsiz çıxmasını, qaçqınlara öz yurd-yuvalarına qayıtmaq üçün şərait yaradılmasını və münaqişənin sülh yolu ilə həllini tələb edib. Amma zəhlə tökən etnik üstünlük və dözümsüzlük fikirləri, “Böyük Ermənistan” haqqında irredentist ideyaları, tarixi revizionizm və Azərbaycanın irsinə qarşı soyqırım niyyəti ilə hərəkət edən Ermənistan Respublikası və onun işğal etdiyi Qarabağdakı “azadlıq döyüşçüləri” beynəlxalq tələblərə hələ də məhəl qoymurlar.

PBS ictimai əsaslarla yaradılmış və vergi ödəyənlərin ödəmələrinə arxalanan bir xidmətdir. Biz sizin sağlam düşüncənizə müraciət edərək, bu sənədli filmi yayımlamamağa çağırırıq. Biz informasiya azadlığına fundamental konstitusiya hüququ kimi hörmət edirik, amma bu filmin yayımı çox pis xidmət olardı və PBS tamaşaçılarının intellektini məhdud maraqları olan bir qrupun xeyrinə təhqir etmiş olar. Bu yayım münaqişədə həlak olan 30 000-dən çox azərbaycanlı və erməninin xatirəsinə hörmətsizlik olar və evinə qayıda bilməyən və bir çoxunun hələ də qaçqın düşərgələrində əziyyət çəkdiyi yüz minlərlə azərbaycanlı məcburi köçkünü təhqir etmiş olar”.