Diaspor

Diaspor

Nazim İbrahimov: “Türk millətinin vahid diasporu olmalıdır” - FOTO

Nazim İbrahimov: “Türk millətinin vahid diasporu olmalıdır” - <font color=red>FOTO</font>

21 oktyabr 2010 12:25 (UTC +04:00)

Bunu İstanbulda keçirilən Dünya Türk Forumunda çıxışında Azərbaycanın Diasporla İş üzrə Dövlət Komitəsinin sədri Nazim İbrahimov deyib. Komitənin mətbuat xidmətindən APA-ya verilən məlumata görə, N. İbrahimov türk dünyası üçün böyük əhəmiyyət daşıyan bu toplantının açılışı münasibətilə Azərbaycan prezidenti İlham Əliyevin qonaqlara və iştirakçılara salamlarını çatdırıb. Dövlət Komitəsinin sədri deyib ki, türkdilli ölkələrin dövlət başçılarının zirvə toplantıları, türk dövlət və cəmiyyətlərinin dostluq, qardaşlıq və əməkdaşlıq qurultayları və digər önəmli toplantılarda Azərbaycan da yaxından iştirak edib: “2007-ci il mart ayında Azərbaycan prezidentinin təşəbbüsü ilə Bakıda keçirilən Azərbaycan və Türk Diaspor Təşkilatları Rəhbərlərinin I Forumunda bu əməkdaşlığın konkret prinsip və istiqamətlərini müəyyənləşdirən «Azərbaycan və Türk diaspor təşkilatlarının birgə fəaliyyət strategiyası» qəbul edilib. “Məhz bu strategiya əsasında bir vaxtlar yalnız arzu etdiyimiz xəyallar gerçəkliyə çevrilmiş – 2008-ci ildə Türkdilli Ölkələrin Parlament Assambleyasının yaradılması, 2009-cu ildə Ortaq Türk televiziyasının fəaliyyətə başlaması mümkün olub”.

N. İbrahimov qeyd edib ki, 2010-cu ilin sentyabrında Türkiyədə keçirilmiş Türkdilli ölkələrin dövlət başçılarının X zirvə toplantısı bütün türk dünyası üçün tarixi əhəmiyyət daşıyan qərarların qəbulu ilə yadda qalıb. Komitə sədrinin sözlərinə görə, türk xalqları arasında birliyin və həmrəyliyin daha da möhkəmləndirilməsi qarşıda dayanan vacib vəzifələrdəndir: “Dünyanın müxtəlif ölkələrində fəaliyyət göstərən Azərbaycan diasporu digər türk xalqlarının diasporları ilə sıx əməkdaşlıqdadır. Ulu öndərimiz Heydər Əliyevin söylədiyi “Bir millət iki dövlət” fkrinə, kəlamına əsaslanaraq “Bir millətin bir neçə diasporu ola bilməz, bizim vahid diasporumuz olmalıdır” prinsipi ilə fəaliyyətimizi davam etdiririk”.
Bu tipli tədbirlərdən birinin Bakıda keçirilməsinin mümkünlüyünü qeyd edən Dövlət Komitəsinin sədri vurğulayıb ki, dünya dövlətlərində türk xalqlarının səsinin daha da yüksəklərdə eşidilməsi üçün Azərbaycan dövləti hər zaman bütün imkanlarını ortaya qoymağa hazırdır.
Komitə sədri onu da deyib ki, diasporumuzun gələcək fəaliyyətində soydaşlarımızın yaşadıqları ölkələrdə doğulub təhsil almış, formalaşmış, həmin toplumun ictimai-siyasi mühitinin aktiv iştirakçısı olan övladlarına-gənclərinə xüsusi diqqət yetirməliyik. Onlar öz fəaliyyətlərində gələcəkdə türk dünyası daha böyük töhfələr verə bilərlər. “Bu gənclərin daha da yaxşı təşkilatlanması, əlaqələndirilmiş formada fəaliyyət göstərə bilmələri üçün konkret addımlar atırıq” deyən Nazim İbrahimov bildirib ki, məhz bu məqsədlə noyabrın 27-28-də Almaniyanın Frankfurt şəhərində Dünya Azərbaycanlı Gənclərinin I Konqresi keçiriləcək.

N. İbrahimov Dünya Türk Forumunun türk dünyasının birliyi ideyasına xidmət edəcəyinə inandığını deyib.
Tədbirdə, həmçinin Mardin Valisi Hasan Duruer, Türkiyə Böyük Millət Məclisinin (TBMM) üzvləri Şenol Bal, Hüseyn Pazarçı, TBMM-nin Avropa Birliyinə inteqrasiya komissiyasının nümayəndəsi Yusif Ziya İrbeç, TÜRKSOY-un baş katibi Dussanbay Kasseinov, Kosovadan türk əsilli nazir Mahir Yağcılar çıxış ediblər.
Qısa fasilədən sonra forum “Qlobal və regional problemlərin türk dünyasına təsiri” mövzusunda müzakirələrlə davam etdirir. Tədbir çərçivəsində “Türk dünyasında qeyri-hökumət təşkilatları və vətəndaş cəmiyyətinin təşəkkül tapması önündəki problemlər”, “Türk mədəniyyəti” və digər mövzularda seminarlar da keçiriləcək.

Qeyd edək ki, bu gün İstanbulda “Grand Cevahir Hotel”de Türk-Asiya Strateji Araşdırmalar Mərkəzinin (TASAM) təşkilatçılığı ilə “Türk Şurası, türk diasporu və sosial-iqtisadi əməkdaşlıq” mövzusunda Dünya Türk Forumu başlanıb. Tədbirin təşkilinə Türkiyə hökuməti ilə yanaşı Azərbaycanın Diasporla İş üzrə Dövlət Komitəsi də dəstək verib. Forumda 60 ölkədən türk dünyası və diasporlarının nümayəndələri iştirak edir. Tədbirə Diasporla İş üzrə Dövlət Komitəsinin sədri Nazim İbrahimovun rəhbərlik etdiyi Dövlət Komitəsinin nümayəndə heyəti, həmçinin Azərbaycanın fəal diaspor təşkilatlarının rəhbərləri də qatılıblar.

Forum işini sabah yekunlaşdıracaq.