Diaspor

Diaspor

ABŞ-dakı Azərbaycan diasporu noyabrın 2-də keçiriləcək seçkilərdə aktiv iştirak edəcək

25 oktyabr 2010 08:06 (UTC +04:00)

Vaşinqton. İzabel Levin-APA. Azərbaycanın milli maraqları, ABŞ-Azərbaycan münasibətlərinin prioritetləri və digər amillər 2010-cu il Noyabrın 2-də keçiriləcək aralıq seçkilərdə Amerikada yaşayan azərbaycanlılar üçün prioritet məsələlər olacaq. ABŞ-dakı Azərbaycan diasporundan APA-nın Vaşinqtondakı müxbirinə bildiriblər ki, seçkilərdə fəal iştiraka hazırlıq gedir: “Biz Amerikalı azərbaycanlılar və daha geniş mənada desək Amerikalı Türklər seçkilərdə fəal iştirak etməyə hazırlaşırıq. ABŞ-ın Türk əsilli vətəndaşlarının seçkilərdə iştirakı çox vacibdir”.

ABŞ Azərbaycanlıları Şəbəkəsindən (USAN) bildiriblər ki, namizədlər arasında Amerikalı azərbaycanlılar olmasa da, Merilend, Texas və Kaliforniyadan bir neçə türk namizəd var. USAN Direktorlar Şurasının üzvlərindən biri Azərbaycan icması ilə uzun müddət əlaqələri olan namizəd Öz Bengurun seçki kampaniyasında fəal iştirak edir.

Bu il Öz Bengur Merilend ştatının qanunverici orqanında təmsil olunmaq üçün mübarizə aparır. Onun böyük təcrübəsini və tanınmış sima olduğunu nəzərə alaraq deyə bilərik ki, o, ABŞ ştatlarının qanunverici orqanlarına seçiləcək ilk türk ola bilər.

Bundan başqa Amerikalı azərbyacanlılar Metyu Brayzanın Azərbaycana səfir təyin olunmasına etiraz edən Kaliforniyadan olan demokrat senator Barbara Bokserin seçki prosesinin əleyhinədirlər. Diaspora üzvləri ermənipərəst namizədlər Maykl Bennet (Demokrat, Kolorado) və Harri Reydin (Demokrat, Nevada) də əleyhinə çıxış edəcəklər.

Son rəy sorğularının nəticələrinə görə, onların üçünün də seçkilərdə məğlub olma ehtimalı böyükdür. Əgər belə olarsa, onları erməni lobbisinə daha az meylli olan neytral senatorlar əvəz edəcək.