Diaspor

Ana səhifə

Diaspor

Azərbaycanın Dövlət Komitəsi: Əlikram Hümbətovun oğlu və onun yaxın ətrafının təşkil etdiyi aksiyalar separatçılıq, bölücülük və xəyanətdir

10 noyabr 2010 14:42 (UTC +04:00)

Ölkəmizin artan hərbi qüdrəti, böyük iqtisadi potensialı, demokratik ənənələrin təşəkkülü istiqamətində atdığı qətiyyətli addımlar bu qüvvələri daha çirkin üsullarla fəaliyyətə keçməyə vadar edir. Bu günlərdə Vətən xaini, separatçı Əlikram Hümbətovun oğlu və qohumlarının Niderland Krallığının Den Haaqa şəhərində Avropadakı bəzi siyasi dairələrdən aldığı qrantlar hesabına Azərbaycan dövləti əleyhinə təşkil etdiyi aksiya bunun bariz nümunəsidir”.
Bu barədə Azərbaycanın Diasporla İş üzrə Dövlət Komitəsinin bəyanatında bildirilir. Komitədən APA-ya daxil olan bəyanatda daha sonra bunlar qeyd olunub: “Məkrli siyasi iddialarını həyata keçirə bilmədiklərinə görə bütün varlığı ilə Azərbaycana nifrət edən, onun uğurlarını gözü götürməyən bu adamlar yenə də öz xislətlərinə uyğun üslub seçərək əsl simalarını nümayiş etdiriblər. Acı təəssüf hissi ilə qeyd edirik ki, aksiyada iştirak edənlər hələ də özlərini «azərbaycanlı» adlandırmağa cəsarət edirlər. Azərbaycanı bölünmüş və parçalanmış görmək istəyən, bu mənfur arzunun həyata keçirilməsi naminə hər kəslə əməkdaşlığa hazır olan separatçılar getdikcə daha böyük pessimizmə və ümidsizliyə qapılaraq aqressivləşir və adi etiket qaydalarını kobud şəkildə belə tapdalamaqdan çəkinmirlər. Azərbaycan dövlətinin beynəlxalq imicinə zərb vurmağa, onun nüfuzunu aşağılamağa çalışan bu qüvvələr hələ də dərk etmir ki, bu cür təşəbbüslər əbəsdir, Azərbaycan xalqının milli birliyinə və həmrəyliyinə, onun bütövlüyünə, dövlətimizin möhkəmliyinə, dövlətçiliyimizin qüdrətinə xələl gətirə bilməz”.
Niderlandda və digər Avropa ölkələrində fəaliyyət göstərən Azərbaycan diaspor təşkilatlarından daxil olan müraciətləri nəzərə alaraq, Dövlət Komitəsi Əlikram Hümbətovun oğlu Tural Hümbətov və onun yaxın ətrafı tərəfindən təşkil olunmuş bu cür aksiyaları separatçılıq, bölücülük və xəyanət kimi qiymətləndirir: “Xarici ölkələrdə yaşayan bütün soydaşlarımızı bu çirkin üsluba layiqli cavab verməyə çağırırıq. Əminik ki, vətəndaşlıq mənsubiyyətindən, siyasi baxışlarından və əqidəsindən asılı olmayaraq, hər bir azərbaycanlı bölücülüyü və separatçılığı təşviq edən bu təşəbbüslərə öz qəti münasibətini bildirəcək”.